Lene Knüppel: Naalakkersuisut siulittaasuat kammalaatersorpoq

Sisimiuni qaammatip tulliani nunaqarfiit 60-it aallartitaat ataatsimeersuassapput. Ataatsimeersuarnissaq millionit aappaata affaanik akeqassaaq.

Inatsisartuni ilaasortaq Lene Knüppel Demokraatineersoq isumaqarpoq naalakkersuisut siulittaasuat nunaqarfiit ataatsimeersuarnissaanni aaqqissuisussanik toqqaagami kammalaatersortoq.

Naalakkersuisut allattoqarfiata januaarimi siunnersuisartut Toornaq Consulting Aps nunaqarfiit ataatsimeersuarnissaanik aaqqissuisussatut toqqarpaat. Isumaqatigiissut oqaasiinnakkut isumaqatigiissutaasoq

Namminersornerullutik Oqartussani pisortaanerup Kaj Kleist-ip oqaatigaa. Qaammat ataaseq qaangiutiinnartoq naalakkersuisut siulittaasuata aalajangerpaa siunnersuisartut allat atorneqassasut, Arctic Innovators Aps-ilu toqqarneqarput. Taakku 2004-mi nunaqarfiit ataatsimeersuarnerat aaqqissuukkaat, Kaj Kleist-ip ilanngullugu oqaatigaa.

Siunnersuisartunik nutaanik toqqaasoqarmat nunaqarfiit peqatigiiffianni siulittaasoq Karl Tobiassen isumaqatigiissuteqarfigineratigut pivoq.

Toornaq Consulting-imik isumaqatigiissuteqarneq unitsinneqarmat Namminersornerullutik Oqartussat 80.000 koruuninik Toornaq Consultingimut aningaasartuuteqarput, Arctic Innovators-imillu nutaamik isumaqatigiissuteqarneq 264.000 koruuninik akeqarpoq. Arctic Innovators-imi piginnittuuvoq Per Kunuk Lynge, Nuummi Siumup immikkoortortaqarfiani siulittaasup tullia. Demokraatineersoq Lene Knüppel isumaqarpoq kammalaatersortoqartoq.

-Isumaqarpunga Siumukkut kammalaatersortut, takusinnaanngilaralu suna tunngavigalugu siunnersuisartunik allanik qeqqinnaani taarsisoqassanersoq, Lene Knüppel oqarpoq. Lene Knüppel-ip pisoq malersoqqinniarpaa naalakkersuisunullu apeqquteqaateqarniarluni.

Arctic Innovators-ikkut sooq toqqarneqarsimanersut Namminersornerullutik Oqartussani pisortaanerup Kaj Kleist-ip oqaaseqarfigerusunngilaa.

Aamma Toornaq Consulting-iminngaanniit pisoq oqaaseqarfigineqarusunngilaq, ullaq mannalu Per Kunuk Lynge Arctic Innovators-imeersoq oqaaseqartinniaraluaratsigu pissarsiarinngitsoorparput.