Lene Espersenip kalaallit qutsavigai
- Maani Kalaallit Nunaanni inunnik nuannaartunik qungujulasunillu naapinneqartarnera assorujussuaq uannut ajasoortitsivoq. Tamanna kalaallit uunga pisumut qaaqqusisuusutut tulluusimaarnerminnik takutitsinerat - tamannalu Issittup ulluinnarni eqqarsaatigineqarnissaanut tamatsinnut pitsaanerpaamik qulakkeerinnissinnaavoq, taama oqarpoq Lene Espersen ippassaq tusagassiortunik katersuutitsinermi. Aamma tassani Nuuk eqqaamaneqartussanngortoq naqissuserpaa:
- Nuummi Kalaallillu Nunaanni innuttaasunut ataatsimeersuarnerup immikkut ittumik eqqaamaneqaatissaanut qujanarsuaq. Tamatuma kingorna qanorluunniit pisoqaraluarpat maani pisoq puigorneqarnavianngilaq, Lene Espersen oqarpoq.
Tamannalumi ippassaq Kuupik Kleistip radioaviisimi oqaasiinut naapertuuppoq, tassani nunanut allanut tunngasunut ministerit tamarluinnarmik inuiaat kalaallit tikeraartoqallaqqinnerat qutsatigeqqullugu oqqersuutigisimammassuk.