- Danmarkimi oqartarpugut "nunami pissutsit ilisimanngikkukkit taava nunamit tassannga aallaannarit". Nasartaateqarneq Afghanistanimi ileqqutoqaavoq. Tamanna nunamut tamaanga tikeraartilluni ataqqineqartariaqarpoq.
Lene Espersen Afghanistanimi nunanut allanut ministerimik dr. Zalmai Rassoulimik ataatsimeeqateqartilluni nutsani qaamasut nasartaammik poorsimatillugit taama nassuiaavoq.
Danmarkimili Lene Espersenip partiiata Konservativet, muslimit nasartaateqartarnerat aamma ingammik matoqqavissunik assiaqutaqartarnerat saassutarigaluarpaat.
Afghanistanimili nunanut allanut ministerimik ataatsimeeqateqarneq aallartitsinnaguli Kabulimi qallunaat aallartitaqarfiata Lene Espersen ataqqinninnerminik takutitsiniassammat nasartaateqaqqullugu siunnersorsimavaa. Tamatumani Afghanistanimi tusagassiortunik najuuttoqarnissaa aamma pissutigalugu. Taamatullu siunnersorneqarneq Lene Espersenip tassa malissimavaa.