Lektori: Sulisut ineriartornermut malinnaatinneqartariaqarput

Ilinniartitaanermut pilersaarut ”Siunissaq pilersiguk” pillugu Nuummi isummersoqatigiittoqarpoq, Jørgen Rafnilu tassani ullumi saqqummiussisussaalluni:

- Kalaallit Nunaat 1960-ikkunnili ullumimut sukkasuumik ineriartorsimavoq, tassungali atatillugu ilinniartitaanermut pilersaarut assut pissanganarpoq, inuiaqatigiinnullu kalaallinut iluaqutaaginnassalluni, lektor Jørgen Rafn oqarpoq, nangipporlu:

- Inuulli ataatsip ineriartornermut malinnaatinneqarnissaa naleqqussartuartariaqarnissaalu ajornakusoorsinnaavoq, ilisimatooq Roskilde Universitetimeersoq radioaviisimut oqarpoq.

Ilinniartitaaneq pillugu Nuummi isummersoqatigiinneq Jørgen Rafnip iluaraa, susassareqatigiit tamarmik katersuussinnaanerat siunissaq eqqarsaatigalugu isumalluarnartillugu.

- Kisitsisimmi takutippaat ilinniarusuttut amerliartuinnartut, ilinniakkaminnillu naammassinnittartut amerliartuinnartut. Taamaammat ilinniartitaaneq pillugu isummersoqatigiinnermut peqataasinnaanera nuannareqaara, Jørgen Rafn oqarpoq.

Jørgen Rafn Roskilde Universitetimi lektoriuvoq, ilinniartitaaneq pillugu ilisimatusarsimasutut lektoriulluni.