Leif Mikkelsen Venstrenit anivoq

Talerperliuniat Folketingimi amerlanerussuteqartut, tassaasut Venstre, Konservative aamma Dansk Folkeparti qajannarsiartulerput. Venstret timersorneq pillugu oqaaseqartartuat Leif Mikkelsen ullaaq nalunaaruteqarpoq partiiminit anilluni, Naser Khaderillu partiianut nutaamut NyAlliancemut ilaasortanngorniarluni.

Tamanna pivoq Dansk Folkeparti ilaasortaminut marlunnut inuulluaqqusereersorlu, tassasunut Morten Messerschmidt aamma Louise Frevert.

Folketingimut ilaasortat marluk partiinut naalakkersuisuutitaqartunut imaluunniit Dansk Folkepartiimut ilaasortaasut ilaasortaajunnaaraluarpata Danmarkimi naalakkersuisut amerlanerussuteqarunnaassapput. Tamanna tunngavigalugu ministeriuneq Anders Fogh Rasmussen

ullumi oqarpoq naalakkersuisut amerlanerussutaaruppata qinersisitsisoqassasoq.

- Pissutsit ullumikkut taama inissisimapput, amerlanerussuteqarnerput ajunngitsumik inissisimavoq. Kisianni taamaattoqarunnaassagaluarpat qanoq kinguneqassanersoq kikkut tamarmik nalunngilaat, ministeriuneq oqarpoq.

Taanna aperineqarami taama oqarnera NyAlliancemut nuunniartunut mianersoqqussutaanersoq, akivoq pissutsit qanoq inissisimanerat oqaatigiinnarini.

Danmarks Radiumi naalakkersuinikkut naliliisartoq Klaus K. Nielsenip pissutsit ima nalilerpai:

- Sapaatip akunnerata siulia tikillugu ministeriuneq oqallinnermi saassussisarluni ingerlatsigaluarpoq, ullulli ikittuinnaat ingerlaneranni tatineqaleraluttuinnarpoq naalakkersuisullu qanoq iliussanersut eqqarsaatigisariaqalerlugu.

Maanna sioorasaarummik saqqummiussisariaqalerpoq, pissutigalugu naalakkersuisut tunuliaqutaat 90-init ikinnerulissagaluarpata naalakkersuisut tunuliaqutaat allanngussammata, naak qinersisartut aperineqanngikkaluartut. Taamaattumik pissutsit allanngorpata qinersisartut aperineqarnissaat pissusissamisoorluinnarpoq, Klaus K. Nielsen naliliivoq.

Leif Mikkelsen Venstre-nit anisoq partiimi ukiuni 40-ni ilaasortaasimavoq.