Leif Fontaine-p isumasioqatigiissimaneq isornartorsiorpaa
Siumukkut KNAPK-illu sapaatip-akunnerata naanerani isumasioqatigissimanerat naalakkersuinikkut suliaqartut kisimik eqqumigiinngilaat ajuusaarutigalugulu.
KNAPK-ip siulersuisuisa akornanni Isumasioqatigiissimaneq oqallisaavoq minnerunngitsumik isumasioqatigiinermi angusarineqartut. Siunissami aalisarnikkut politikkissami anguniagassatut siunniussat 14-it isumaqatigiissutigineqarput – isumaqatigiissutigineqartuni Siumut KNAPK-illu qanittumik suleqatigiinnissaannik eqqarsaateqarneq. KNAPK-ip siulersuisuini ilaasortaq Leif Fontaine isumaqataanngilaq. Isumasioqatigissimanermi isumaqatigiissutigineqartut KNAPK-ip kattuffittut maleruagassaanik unioqqutitsineruvoq taamatut isumaqarpoq Leif Fontaine. KNAPK-iimmi maleruagassaani paragraf 1–imi allassimavoq: Kattuffik Politikkikkut suliniaqatigiiffiit arlaannulluuniit pituttorsimassanngilaq. Leif Fontaine KNAPK-ip siulersuisuini ilaasortaq tusagassiuutinut allagaqarnermini allappoq. Partiimik isumaqatigiissuteqarluni atsioqatigiinneq KNAPK-i maleruagassaanik illuatungiliisoq, tassalu politikkikkut suliniaqatigiiffimmik soqutigisaqaqatigiinnilluunniit pittuttorsimannginnissamik maleruagassaq illuatungilerneqartoq. Ilanngullugu Leif Fontaine-ip KNAPK-mi siulersuisoqatini isornartorsiorpai isumasioqatigiittoqarnissamik ilisimatitsissut KNAPK-ip ulluinnarni aqutsisuinut taamaallat ilisimatitsissutigineqarsimanera, taamatullu isumasioqatigiinneq naammassippat isumaqatigiissusiortoqarnissaq ilisimatitsissutigineqarsimanani, taamaalllaat KNAPK isumasioqatigiinnermi saqqumiiumaartoq.
