Biden USA-p Mexicollu killeqarfianni qammarsuarmut takornarniartoq

USA-p Mexicollu killeqarfianni qammarsuaq Donald Trumpip præsidentiugallarami nappartippaa, maannalu præsidentiusoq Joe Biden tassungalu ippassaq sapaammi takuniaavoq.

USA-mi maanna oqallisaanerpaat ilagaat USA-mut nunasisarneq. Tassunga iliuuseqarniarnini takutinniarlugulusooq Biden qammarsuarmut ippassaq sapaammi takusaavoq.

Mexicomut qammarsuaq Donald Trumpip præsidentiugallarami suliaasa annerpaat ilagaat.

Biden qammarsuarmut alakkaanngitsiarluni oqarpoq Cubamiut, Haitimiut Nicaraguamiullu USA-mut nunasiniartarneri pillugit inatsisinik sukaterissalluni.

AAMMA ATUARUK Paavip Joe Biden ajugaaneranik oqarasuaatikkut pilluaqqugaa

Taamaalilluni Mexico aqqutigalugu USA-mut nunasiniat Mexicop killeqarfiani unitsitaasartut amerlanerulissapput.

Bidenilli iliuuseriniagaa Greg Abbottip Texasimi guvernørip, tullianillu præsidentimik qinersisoqalerpat republikanerit sinnerlugit sassartussatut ilimagisaasup pikkugivallaanngilaa. Taassumami Biden nunasiniat pillugit inatsisinik aqutsilluanngitsutut pisuutippaa.

- USA-p tunngaviusumik inatsisaa unioqqutippat, inatsisit iluaqutigalugit nunasiniat USA-mut isaajuarmata. Greg Biden Texasimut tikilermat ilaatigut taama allaffigaa.

Biden nutaarsiassaqartitsivinnut oqarpoq Abbottip allagaa suli atuarsimanagu.