Lars Weiss-imut siarnguttunnguuput
Rumaaniumiu umiatsiaararsorluni Davis-ip ikerasassua ikaarsimagaa ilisimaneqalermat, Sisimiormiu Lars Weiss-ip ikinngutai siarnguttut imaaginnavissimapput.
Lars Weiss-imi tassaavoq Rumaaniumiumut umiatsiaaqqamik tunisisimasoq.
Umiatsiaq 49.000 koruunilersillugu tunineqarsimasoq Lars Weiss oqarpoq, angulli avannamut angalaniarnera toqqissisimanartissimanagu.
Aallarnissamut aqaguttoq rumaaniamiu Lars Weiss-imut sianermat paasinarsivoq rumaaniamiu ilisimasakittorujussuusimasoq.
- Umiatsiaq qanoq aallartinneqassanersoq apeqqutigaa, Lars Weiss oqarpoq, nangillunilu:
- Allaanngilaq siornatigut angalaartarsimanngitsoq.
Immap assingnik sumiissusersiuummillu, GPS-imik, peqarsimavoq, taannali Aasiaat tungaanuinnaq asseqarsimavoq.
Taamaammat tupigineqarsinnaassaaq angut rumaaniamiu Ellesmere-p qeqertaanut Qausuittumut apuussinnaasimammat.