Lars-Pele Berthelsen nersornaatisivoq
Tassa Kalaallisut atuakkiaq oqaluttuarisaanermi siullersaaq Nunat Avannarliit Killiit meeqqanut inuusuttuaqqanullu atuakkianut nersornaasiuttakkamik taamaasilluni nersornaaserneqarpoq. Nersornaallu 60.000 koruuninik aningaasartaqarpoq. Taamatut nersornaasiisarnerit ukiut allortarlugit pisarpoq, ukiorlu manna arfinilissaannik tunniunneqarluni.
Nunat Avannarliit Killiit siunnersuisoqatigiivini atuakkianik nersornaasigassanik naliliisartut tassaapput professor Dagny Kristjansdottir Islandimiuusoq, Oddfridur Marni Rasmussen Savalimmiormiuusoq, kiisalu Vera Lisa Rosing Olsen Nunatsinneersuusoq. Taakku Lars-Pele Berthelsenip meeqqanut inuusuttuaqqanullu atuakkiaata nuannernersaajunera isumaqatigiissutigisimavaat, tassalu nersornaaserlugu.
Atuakkat nersornaaserneqartussatut piukkunneqarsimasut tassaapput Med heiminn i vasanum (Nunarsuaq Kaasarfimmioralugu), Margreti Örnolfsdottir, Skriva i sandin (Sioqqani allassimasoq), Marjuna Syderbø Kjelnæs-ip Savalimmiormiuusup atuakkiaa, kiisalu Lars-Pele Berthelsenip atuakkiaa nersornaaserneqartoq Kassalimmik oqaluttuaq.
