Lars Løkke tapersersortitaarpoq
- Danmarkip siulittaasuunissaa Frankrigimit tapersersorniarneqartoq, Sarkozyp neriorsuutigaa. Nunat assigiinngitsut siuttuisa pimoorussillutik suliniarnissaat, New Yorkimi sapaatip-akunnerata siuliani ataatsimiittoqarmat ujartorpara, pimoorussiumasullu tassaapput Frankrigimeersut, Lars Løkke Rasmussen naqissusiivoq.
Silap pissusaata allanngoriartornerata akiorniarneqarnissaa pillugu Københavnimi ataatsimeersuarnermi isumaqatigiittoqarsinnaanissaa angujumallugu - Frankrigip siunnersuutigisaatut - immikkut ittumik novembarimi ataatsimiittoqassanersoq suli aalajangiunneqanngilaq.
Frankrigip præsidentia Sarkozy New Yorkimi sapaatip-akunnerata siuliani tamanna siunnersuutigaa, ataatsimiittoqassanersorli nalunarallarpoq, ministeriunerup Lars Løkke Rasmussenip Naalagaaffiit Peqatigiit siuttua Ban Ki-moon peqatigalugu tamanna aalajangertussaammagu.