Lars Geråe: Taarsiiffigitittoqarsinnaanngilaq

Qipoqqaat aalisarnermut akornusersuisut suneqarsinnaanngillat. Annaasat, soorlu saarullinniutit bundgarnit suliassanngornerat annaaneralluunniit taarsiiffigisinnaanngikkitsik, Piniarnermut Aallaaniarnermullu Pisortaqarfimmi allaffimmi pisortaq Lars Geråe oqarpoq.

- Soorunami immaqa qinnuteqartoqarsinnaavoq annaasaqarnissamut taarfiiffigineqarnissamut imaluunniit aallarteqqinnissamut taarsiiffigineqarnissamut. Kisianni tassani paasisakka malillugit akuerineqarneq ajorput, pissutigalugu annaasat driftimut attuumassuteqartarmata, soorlu aqutsinermut nalinginnaasumut. Assersuutigalugu bundgarnersorneq qaleralinniarnermut assinguvoq – qaleralinniarnermi qassutaarsiuteqartoqartillugu taarsiiffigineq ajorpagut, soorlu aamma kapisilinniarnermut aamma kilisaatersortut annaasaqartillugit. Tassa allanik qassutaateqarsimagunik bundgarniuteqarsimagunilluunniit taamannak nalilerneqartarpoq, Lars Geråe nassuiaavoq.

Aperaarput qanittumi arlaliunerusut ajutoorsimasut tutsiutissagaluarpata iliuuseqarsinnaanersut.

- Taamaallaat inatsisartut inatsisaat innersuussutigisinnaavara – ajunaarnersuaqarnermut tunngatillugu qinnuteqartarfik. Taanna taamaallaat aallarteqqinnissamut qinnuteqartarfittut ilisimasaqarfigivara, allamillu periarfissaqarnersoq naluara, Lars Geråe oqarpoq.

Qipoqqaq qassutinut napitilluni katassinnaajunnaartoq toqunneqartariaqartorlu aalisartup annaasaqartup atorluarsinnaanngilaa, soorlu mattaa, qiporaa neqaalu tuniniarlugu?

- Eqqaasitsissutigissavara arfeq – qipoqqaq – eqqissisimatitaalluinnarmat, taamaalilluni aamma iluanaarniutissaanngimmat. Taamaallaat pisortaqarfimmiit matussusertussaavagut aningaasartuutit qipoqqaap toqunneqarneranut pilanneranullu tunngasut. Nerisassartaalu pisortat ingerlataannut assigiinngitsunut agguarneqartarput, Piniarnermut Aallaaniarnermullu Pisortaqarfimmi allaffimmi pisortaq Lars Geråe oqarpoq. Qipoqqaat akornutaanerannut tunngasumik Aalisarnermut Piniarnermullu Kattuffiup KNAPK-p saaffiginnissutaanut akissut manna pisortaqarfimmi suliarineqarpoq.