Lars-Emilip suleqatigiissitaliortitsiniarnera akerlilerpaa

Lars-Emil Johansenip Kalaallit Nunaannut tunngassuteqartunut ataatsimiititaliami siulittaasutut suleqatigiissitaliamik pilersitsinissamik siunnersuutaa, Juliane Henningsenip akerlilerpaa.

- Peqatigiiffiit kattuffiillu suleqatigiinnerat pitsaasorujussuuvoq, aamma politikkikkut piumassutsip alliartornera ilutigalugu isumaqarpunga folketingimi suligasuartussamik suleqatigiissitaliorneq pisariaqanngitsoq, pissutigalugu suliassaq nunatsinniimmat, Juliane Henningsen oqarpoq.

- Illuatungiliuttuninngaanniit siunnersuutit tigulluarneqartannginnerat mumilersoq malunnarpoq. Aamma tusagassiuutitigut anorersuartitsisoqarnerata kingorna danskillu partiivisa oqariartuuteqarnerisa kingorna naalakkersuisut siulittaasuata qanoriliuuseqarnialernera nuannerpoq, naak uagut arlaleriaqaluta siunnersuuteqartareersugut, Juliane Henningsen oqarpoq.

- Misissuinerit assigiinngitsut pigereerpavut aamma siunnersuutit akileraartarnermut tunngasut, ilaqutariit meerartallit atugaasa pitsanngorsarnissaannut tunngasut kiisalu sumiginnagaanermut akiuiniarnermut tunngasut pioreerput. Inatsisartuni siunnersuutigeqqittussaavagut, isumaqaratta ajornartorsiummut iluaqutaasinnaasut.

Aamma nunatsinni aningaasarsaqarnikkut naligiinnginnerujussuaq eqqartussallugu soqutiginarpoq. Tassami ilaqutariit pissakinnerit meeqqaminnut inuunermik nuannersumik imaqarluartumillu tunniussinissaannut kinguneqartarmat.

Folketingip Kalaallit Nunaannut tunngassuteqartunut ataatsimiititaliaani ilaasortaq alla, Line Barfoed, Enhedslistenimeersoq, aamma iliuuseqaqqusivoq. Nutaamik suleqatigiissitaliornissaq isumaqatigivallaanngilaa, nalunnginnamiuk inatsisartuni iluatungiliuttut, Inuit Ataqatigiit partiillu allat, iliuusissanik siunnersuuteqartareersut.

- Siunnersuutilli naalakkersuisuutitaqartut itigartittarpaat. Politikkikkununa piumassuseqartoqartariaqalersoq. Kalaallit Nunaanni ilaqutariit meerartallit ajornartorsiutaat tusartuarpavut. Tupaallannaqaaq innuttaasut inuuniarnikkut assigiinnginnerujussuat iliuuseqarfiginiarneqanngimmat, Line Barfoed oqarpoq.