Lars-Emilip siunnersuutaa assortuussutaavoq

- Nunat issittut pillugit isumaqatigiinniarnerit Kalaallit Nunaannut akisussaaffigineqalerli, taama ersaritsigisumik Folketingimi ilaasortap, Lars-Emil Johansenip sapaatip akunnerata siuliani tusarliuppaa.

Lene Espersenitut qallunaat ministerivisa nunat issittut ataatsimiileraangasa peqataanngitsoortarnissaat ernummatigivaa.

Kalaallit Nunaannut tunngasuni naalagaaffeqatigiiffik Danmarki sinnerlugu isumaqatigiinniartalernissaq Lars-Emil Johansenip orniginartippaa.

Siunnersuut Qqallunaat Nunaanniit assigiinngeqisumik tiguneqarpoq, saamerliunianiilli tapersersorneqarpoq.

- Kalaallit Nunaat Savalimmiullu nunat allat pillugit naalagaafiillu isumannaatsuunissaanik politikkiinut tunngasuni periarfissaqarnerusariaqarput, ullutsinni inatsisaasunut sanilliutissagaanni.

Assersuutigalugu Issittumi siunnersuisoqatigiinni ataatsimiinneq eqqartugaaqisoq pillugu.

- Aap danmarki sinniissuuffigalugu Kuupiup isumaqatigiinniarnerit ingerlassimasinnaagaluarpai, kisiannili Kalaallit Nunaanniit kissaatigineqarnera saqqummiunneqaqqaartariaqarpoq, Line Barfoed Enhedslistip kalaallit nunaannut tunngasuni oqaaseqartartua taama oqarpoq.

Illuatungiliuttunilu siunnersuut isumaqatigineqanngilaq, inatsisinullu tunngavissaqannginnerarpaat.

- Piffissaasorinngilara Kalaallit Nunaat pisinnaasoq, kisiannili isumaqarpunga Kalaallit Nunaata namminiilivinnissaa utaqqisariaqaqqaartariaqartoq. Naluara Qallunaat Nunaata akuerissaneraa, apeqqutaanerpaavorli nunat allat akuersaarsinnaaneraat, Dansk Folkepartiip nunat allat pillugit oqaaseqartartuat Søren Espersen taama oqarpoq.

Kalaallit Nunaat Danmarki sinnerlugu isumaqatigiinniarsinnaanera, Kuupik Kleistip Lars-Emil Johansen isumaqatigaa.

- Pissusissamisoorsoraara nunatta namminiilivinnissaata tungaanut aqqutissaalluartoq, Kuupik Kleist oqarpoq.