Lars-Emil: Qaqqaq qaqereernikuusara qaqeqqiffiginianngilara
Taamatulli aaqqissuussisoqarsimanera, Lars Emil Johansenip allanngortittariaqarsoraa, ilaasortammi sinerissamit takkuttuunerat aamma eqqarsaatigisariaqarmat, Lars Emil Johansen oqarpoq:
- Sinerissatsinninngaanniit tamarmik aggersuupput, taava isummersoqatigiinnerit, qajaqatigiiaalluni suleqatigiiaalluni pilersaarusioqatigiinnerit, taanna ataatsimeersuarnerup ilavia taanna soorlu sanngiillisutut ikkami taama pisoqariaruni,
Lars Emil Johansen oqarpoq.
Siumumi siulittaasussarsiornermi qinigassanngortinniartut taamaammat piffissaq kingullerpaaq atorlugu sassarsinnaanissaat, Lars Emil Johansenip orniginartinneruaa:
- Isumaqarpunga sekundi kingulleq tikillugu qinigassanngortittoqarsinnaasariaqartoq, Lars Emil Johansen oqarpoq, imalu nangilluni:
- Atorfilippalaarpallaartumik aalajangersaasaqattaalersimagatta partiitta iluani. Sapaatip-akunneri marluk sioqqullugit, sapaatip-akunneri ima amerlatigisut sioqqullugit ataatsimiinneq sioqqullugu aalajangiisoqarisiissaaq qinigassanngortittoqassanersoq. Uanga qinersisarneq eqqarsaatigalugu partiip siulittaasuanut, tulliinut, taavalu siulersuisuunernut qinersinerit pissasut killiersorneqanngitsumik partiip ataatsimeersuarnerani, Lars Emil Johansen oqarpoq.
Kikkut siulittaasussatut sassarniarnersut piffissaq kingulleq tikillugu pissanganarsinnaasariaqartoq, Lars Emil Johansenip oqaatigaa, naallu siulittaasup taarserneqarnissaa kissaatiginngikkaluarini, partiimut siulittaasussamut sassartaartoqarsinnaasariaqartoq, oqarpoq:
- Kinaluunniit akisussaaffimmik annertuumik tigummiguni issiavimmi maagaarpallaartumi issiasussaanngilaq.
Unammillerteqarneq, ataatsimeersuarnermilu soraarummeertutut tamatigut misigisimajuaannarnissaq pingaartorujussuuvoq, Lars Emil Johansen oqarpoq, namminerlu sassarsimasinnaanersoq aperaarput, akivorlu:
- Uanga tassaneereernikuuvunga. Isumaqarpunga qaqqasiortutuut eqqarsarlunga oqarsinnaasariaqartunga: Qaqqat qaqereernikuusakka qaqeqqinnissaat pisariaqanngilaq. Unammineq eqqarsaatigalugu oqaluttuaq uannut taanna naareerpoq.
Kisianni siulittaasumut, siulittaasup tullianut aoqartussaaffiilli allanut qinigassanngortinnissaminnut periarfissaqartariaqarput, Inatsisartut siulittaasuat Lars Emil Johanasen oqarpoq.
