Lars-Emil: Piaartumik ikiuinissaq pingaarnerpaavoq
Kalaallit meerartaat tamarmik kaanngillat, iliuuseriniakkattali ikiorneqarnissaminnik pisariaqartitsisunut apuunnissaat qulakkeerniartariaqarparput, Lars-Emil Johansen oqarpoq.
Meeqqat 6.-11. klassini atuartut 17 procentii "Akulikitsumik" "Tamatigullu" perlilerlutik innartartut, misissuinerup siornatigut saqqummersinneqartup takutippaa.
- Naalagaaffiit Peqatigiit iluanni kattuffiup, UNICEF-ip kalaallit meerartaannik kaanneraanera soorunami naliliineruvoq ilungersunartoq piaarnerpaamik politikkikkut suliaqartunit iliuuseqarfigineqartariaqartoq, Lars-Emil Johansen oqarpoq.
- Aaqqiissuteqarniaruttali politikkikkut oqarluartaarnerit kiisalu kalaallit qallunaallu politikeriisa akornanni imminnut isornartorsioqattaannerat aaqqiissutissanik pilersitsinavianngillat. Uani pineqartumi iliuuserisassanik timitaliipallannissaq pisariaqartinneqarmat. Uanga nammineq Kalaallit Nunaanni pissutsit pillugit Folketingimi ataatsimiititaliaq ataatsimeeqatiseraara. Kalaallimmi meerartaat tamarmik kaanngillat, iliuuseriniakkavulli ikiorneqarnissaminnik pisariaqartitsisunut apuunnissaat qulakkeerniartariaqarpavut. Iliuuserineqarsinnaasutut eqqarsaatigaakka , meeqqat ornittarsinnaasaat Tasiilami ”Amarngivat”-ut Nuummilu ”Mælkebøtten”-itut ittut.
- Iliuuseqarniarnermi Kalaallit Nunaanni Qallunaallu Nunaanni akisussaasut suleqatigiissinnaanerat takorloorluarsinnaavara. Nalunngisakkami naapertorlugit meeqqat pisinnaatitaaffii pillugit nunat tamat isumaqatigiissusiaat naalagaaffeqatigiinnerup aqqani Danmarkip atsiornikuuaa, taamaalillunilu naalagaffik tassuunatigut maleruagassanut pituttorsimalluni. Taamaamat Qallunaat Nunaanni Kalaallillu Nunaanni akisussaasut suleqatigiinnissaat pissusissamisuuinassaaq, ikiortarialinnik piaartumik ikiuinissaq, ikiuutaasinnaasunillu timitaliipallannissaq pingaarnerpaavoq, Lars-Emil Johansen oqarpoq.
