Lars Emil: Otto inuunermik nuannarisaqartuuvoq
Lars Emil Johansen (Siumut) Otto Steenholdtilu (Atassut) Landsrådi pilersinneqarmalli ilaatigut illuatungeriillutik suleqatigiittarnikuupput. Lars Emil Johansenillu Atassumik pilersitsisoq maanna qimagussimalersoq nuannersumik eqqaamasaqarfigaa. Toqukkullu qimagussimasoq tusaramiuk aliatsassimavoq.
- Assorujussuaq killitsippunga. Ukiorpassuarni, Landsrådimi, Inatsisartuni Folketingimilu suleqatigisimasara inuttullu ilisarisimalluagara qimagummat tupigusuppunga, Lars Emil Johansen KNR-imut oqarpoq.
- Eqqarsarpunga 1971-imi qinigaasut nungutaasa ilaat maanna toqukkut qimaguppoq.
Inatsisartut Siulittaasuata illuatungerisarsimasani ikinngutitut taavaa.
- Isumaqatigiinngittuaannangajappugut, taamaakkaluartoq ikinngutigiippugut. Inuk qiimasuuvoq, kalaallisut oqallorilluinnartoq, kalaallisut inuunermut pingaartitsisoq, piniarnermut pingaartitsisoq aammalu inuunermik nuannarisalik, Lars Emil Johansen oqarpoq, nagillunilu:
- Taamaattumik inuuneq taama imartutigisoq uneriataartoq tusarlugu takorloornaqaaq.
Paasissutissat
Otto Steenholdt 1936-imi nunaqarfimmi Qeqertarsuatsiami maanna inuerussimasumi inunngorpoq piniartukkormiunit kingoqqisuulluni. Politikkeritut piniartukkormiunik pingaartitsisutut ilisimaneqarpoq.
Politikkerinngoqqaarami 1971-imiit 1979-imut landrådimi ilaasortaasimavoq. 1979-imiillu 2002-mut Inatsisartuni ilaasortaasimalluni.
Otto Steenholdt aamma Folketingimi 1977-imit 1998-imut Atassut sinnerlugu ilaasortaanikuuvoq, 1999-imilu attaviitsunngorluni.
Otto Steenholdt Namminersornerullutik Oqartussaasimasut Nersornaataannik sølviusumik guldiusumillu nersornaaserneqarnikuuvoq. Taakku saniatigut Dronningip nersornaasiuttagaanik aamma nersornaaserneqarnikuulluni.