Lars-Emil: Kinguartitsisariaqarsimavugut

Naalakkersuisuni ilaasortap aamma folketingimi Namminersornerlu pillugu Isumalioqatigiissitarsuarmi ilaasortap Lars-Emil Johansenip Aningaasanut nunanullu allanut tunngasunut naalakkersuisunngortup folketingimi taartissaa Doris Jakobsen oktobarimi aatsaat folketingimi sulilissaaq.

Doris Jakobsenip taartaarfia junip aallartinneraniit pisussaagaluarpoq, aallartinnissaali oktobarimut kinguartinneqarluni. Taama kinguartitsinermut Lars-Emil Johanseimut apeqqutigaarput, akivorlu:

- Tassa folketingimi siulittaasoqarfik ulluni makkunani oqaloqatigaara. Qinnuigineqarsimavunga namminersorneq pillugu kommissionimi suliakka naammssilivissut, tassa qaammammi tullermi ataatsimiinnerit arlallit peqataaffigisussaavakka. Siulittaasuuffigisanni- inuiattut naalagaaffittullu inatsisiliunneqarneq pillugu ataatsimiititaliaq, kommissionip ataaniittoq- ataatsimiittussaavoq, naggataajussagunartumik, neriuppugut. Taava taassuma kingornatigut Tasiilami ataatsimiittoqassaaq kommissioni tamarmiusoq, naatorsuutaavorlu kommissionimi suliat tamermik septembarimi naammassineqassasut.

Lars-Emil Johansenip aamma oqaatigaa folketingip sulinngiffeqarnerata nalaaniummat iluatsillugu kommissionimi suliassat naammassinissaat peqataaffigerusukkini. Taamaattumik folketingip ukiakkut ataatsimiileqqinnerani Doris Jakobsenilu paarlaannissartik tulluarnerusorigini Lars-Emil Johansen oqarpoq.

Doris Jakobsenip taarsiinnarsinnaannginneraani aperigatsinni oqarpoq suliassat naammassilivissut nutaamik taarserneqarnissaat tulluarsorinanngimmat, Doris Jakobsenilu siusinnerpaamik maajip naanerani aatsaat periarfissaqarluni nalunaarsimasoq.

- Isumaqarpunga paaseqatigiissutigigipput suliasssat naammassilersut, ilaatigut nunanut allanut tunngasunut oqartussaaffiit pingaarutillit oqaluuserineqarnerata siulittaasuuffinni- tassa siulittaasuunngikkaluaruma allaassagaluarpoq – kisianni siulittaasuugama, suleqatigiissitap suliaminik nammassinninnissaa pingaartikkatsigu, nunatsiniit kommissionimiillu pingaartinneqarmat taamatut pilersaaruteqarpunga.

Kikkut taama kissaateqarsimanersut aperigatsinni akivoq:

- Soorunami uanga nammineerlunga aamma kissaatigaara, kisianni siulittaasoqarfik, tassa siulittaasoq Jonathan Motzfeldt siulittaasullu tullia Christian Mejdal, uannut paasititsisimapput assut pitsagissagaluarlugu, tassani suliat ingerlasut naammassilivimmata naammassinissaannut peqataassasunga.

Naalakkersuisut siulittaasoqarfiannit akuerineqarsimanersoq aperiagatsinni akivoq:

- Maannamut ajornartoorutikka Naalakkersuisunut saqqummiuppakka, Naalakkersuisooqatigiinni ajornartorsiutaassanersut paasiniarlugu. Ajornartorsiutaanngillat, maannakkut Inatsiartut siulittaasoqarfianni suliassat taakku ingerlanneqarput.

Lars-Emil Johansen aamma isumaqarpoq taama inissinnini naalakkersuisutut sulilernerminut akornutaassanngitsoq, tassa politikkikkut taama inissinneq misilittagaqarfigereersimanerarpaa, 1979- mi naalakkerusisuni ilaasortanngorami folketingimut septembarimi qinersinissaq tikillugu ilaasortaasimanini assersuutigalugu.