Lars-Emil Julianelu sippuisimanngillat
Folketingimit ukioq kingulleq naatsorsuutit saqqummiunneqaqqammerput. Tassanilu takuneqarsinnaavoq nunarput sinnerlugu Folketingimi issiatitat - Lars-Emil Johansen Siumumeersoq Juliane Henningsen-ilu IA-meersoq, tapisiatit sinnerlugit atuinngitsut, Atuagagdliutit ullumi taama allaatigisaqarput.
Politikerit taakku marluk ukiut tamaasa ukiumut aningaasarsiamik 700.000 koruuniusut saniatigut 1,4 millionit koruuninik tapisisimapput, Lars-Emil Johansen-illi Juliane Henningsen-illu tapisiatik tamakkerlugit atorsimanngilaat. Juliane Henningsen 608.000 koruunit atorsimanngilai, Lars-Emil Johansen-ilu 467.978 koruuninik atorsimanagit.
Juliane Henningsen ukiup ingerlanerani sisamanik sulisoqarsimavoq, taakkulu katillugit 1,1 millionit koruuninik akissarsisimapput. Lars-Emil Johansen ataasiinnarmik sulisoqarsimavoq, 670.000 koruuninik akissarsisimasumik.