Lars-Emil Johansenip folketingimi politikerit pakatsinarnerarpai
- Issittumi pissutsinik misissuititsisoqarnerulernissaanik piumasaqaatigisartakkavut folketingimi taasinikkut itigartitsissutigineqartuaannarput,
Siumup politikkikkut oqaaseqartartuata, folketingimilu ilaasortap, Lars-Emil Johansenip, ullumi Folketingimi ammaanersiorluni oqalliseqataanermini, nunatsinni ineriartupiloorneq pillugu qallunaat politikeriisa malinnaanngippallaarnerat pakatsinaralugu taama oqaaseqarpoq.
Allattoq Oline I. Olsen
oktobarip 04-at 2007 16:58
- Aatsitassallu qallorneqarnerisa nunatsinni namminersulivinniarnerup aningaasatigut qulakkeerneqarsinnaanerinik oqaatigisartakkavut naammagisimaarinnippaluttumik pissuseqarfigineqartarput sinnattualaaginnarnermillu tunngaveqarsorineqartarlutik. Isumaqatigiissutigeriikkavut saneqqullugit Danmarkimik qoqassiiniartutut pasineqartarpugut, quianaannartumillu oqaatsit tamakku qallunaat politikeriinit ilaatigut upperineqartarput, nutaamillu isumaqatigiissusiornissarput piumasarisarlugu, Lars-Emil Johansen oqarpoq.
Inuit ataqatigiit sinnerlugit Inatsisartuni folketingimilu ilaasortaq, Kuupik Kleist Folketingimi aamma oqalugiaateqarpoq, oqalugiaataali piginngilarput.
