Lars-Emil Johansenip Demokraatit aningaasanut inatsimmut isumaqatiginninniaqquvai

Siumup politikikkut oqaaseqartartuata, Inatsisartunut ilaasortap, Lars-Emil Johansenip, Demokraatit maanna kajumissaarpai aningaasanut inatsimmut suliarineqalersumut isumaqatiginninniaqqullugit.

Demokraatineersoq, Jens B. Frederiksen, imaatigut angallanneq pillugu equngasoqarneranik iluarseeqqusilluni ulluni kingullerni kaammattuisarpoq, tamannalu Lars-Emil Johansenip siunnersuusioqqusilluni qaaqqusineranut tunngaviuvoq, Lars-Emil Johansen ima allappoq:

- Uummannami, Upernavimmi, Nanortalimmi

sinerissallu ilaani allani angallannikkut atukkat aaqqiivigineqartariaqarput. Kalaallit Nunatsinni imaatigut aasakkut angallanneq atorunnaarsinneqarsinnaanngilaq. Tamanna isorliunerusuni najugalinnut aamma atuuppoq. Angallannikkut periarfissanik mattussisimaneq kukkuneruvoq, tamannalu aaqqinneqartariaqarpoq, Inatsisartunut ilaasortaq, Lars-Emil Johansen, oqarpoq.

- Allanik aaqqinneqartarialinik aamma equngasoqarpoq, Lars-Emil Johansenilu ima nangippoq:

- Assigiimmik akeqartitsiunnaarnerup kingunipilui inuiaqatigiinnik kalaallinik eqquisut aamma iluarsiivi-gisariaqarput.

Aaqqissuteqarniarluni suliaqarnissamut atatillugu Naalakkersuisooqatigiinnut siunnersuutigissavara Demokraatit isumaqatiginniarnissamut qaaqquneqassasut.

Lars-Emil Johansenillu siunnersuutigaa, politikikkut oqaaseqartartut aningaasanut inatsisissamut siunnersuusiornissamut atatillugu partiini oqaaseqartartut aggustip naalernerani qaaqquneqassasut.