Lars-Emil Johansen USA-mut angalalerpoq
Kalaallit nunaata USA iluaqutiginerusariaqarpaa, taama isumaqarpoq Lars- Emil Johansen, nunanut allanut tunngassuteqartunut naalakkersuisoq.
- Nunanut allanut naalakkersuisunngorninniit USA siullerpaamik angallavigilerpara. Taanna soqqullugu USA-p Københavnimi aallartitaa aaatsimeqatigeerpara. Siunertaraara nunatta USA-llu akornanni suleqatigiinnerup maannamornit timitaqarnerusumik ingerlalernissaanik aqqutissiuussinissara, tassa piaartumik nalunaarutigiaareerlugu taanna. Nunatta USA-mik suleqateqarnini iluaqutiginerusariaqarpaa, USA-p nunarput iluaqutigeqimmagu, Pituffimmi radareqarfik aqqutigalugu. Taamaattumik Joint Comitee-mi suleqatigiinnermut ikorfartuutaasussamik ataatsimeeqateqassaanga niivernermut naalakkersuisoqarfianinngaaniit, taavalu aamma Illersornissamut naalakkersuisoqarfianinngaanneersut ataatsimeeqatigissavakka. Taakkua saniatigut soorunami Air Greenlandip Baltimore-miit Kangerlussuarmut toqqaannartumik timmisartortitsisalernernissaata atulernissaani aamma peqataassaanga, atulerneralu pissutigalugu Washingtonimi Danmarkip aallartitaqarfiani malunnartitsinermi, Baltimore-miit Kangerlussuarmut sisamanngorpat ingerlassaanga, Lars-Emil Johansen oqarpoq.
Nunatsinniit suna piumasaqaatigissanerai
Lars- Emil Johansen aperineqarpoq, akivorlu:
- Piumasaqaatinik erseqqissunik saqqummiussissanngikkallarpunga, kisianni oqaatigissavara nunarput piniarnermik, aalisarnermik, nunaateqarnermik uumasuuteqarnermillu inuutissarsiortoq aamma periafissanik nutaanik maannakkut ammaassilersoq, tassa uuliasiornermik aatsitassarsiornermillu, taavalu taassuma saniatigut aamam erngup nukiliorferujussuanik sanaartornissaq, ilaatigut aatsitseriviliornissaq eqqarsaatigalugu, tamakkunani suleqatigiinnissaq, soorlu issittumi sanaartugassanik amerikamiut immikkut ilisimasaqarput, soorlu timmisartunut mittarfiliornerni aamma umiarsualiviliornerni, tassa tamatumani aamma iluaqutaasinnaanerat oqaatigisassama ilaattut eqqarsaatigaara, Lars-Emil Johansen naggasiivoq.
