Lars-Emil Johansen: - Søren Espersen nunasiaateqartutut eqqarsarpoq

Namminersorneq pillugu isumalioqatigiissitani nunatta pissarititai pillugit isumaqatigiinniartoqarmat Danmark ajunngisaapallaarsimasoq, Søren Espersen Dansk Folkepartiimeersoq isumaqarpoq.

Tamakkiisumik tapiissutit annikillisarneqarnissaat Dansk Folkepartip piumasaraa.

- Nunasiaateqarniatut tamanna nipeqarpoq, Folketingimi ilaasortaatitatta aappaat Lars-Emil Johansen isumaqarpoq:

- Isumaqarpunga Søren Espersen annertoorujussuarmik paatsuugaqarsimasoq isumaqaruni Danmarki Kalaallit Nunaat pigigaa, imaluunniit Kalaallit Nunaanni pisuussutit pigigai. Nunasiaateqarnertut eqqarsarneruvoq, ullumikkullu pissutsinut naleqqutinngilluinnartumik taamaalilluni oqaaseqarluni, Lars-Emil Johansen oqarpoq.

Søren Espersen aviisimut Politikenimut saqqummerluni nunatsinnut tamakkiisumik tapiissutit annikilisarneqarnissaat piumasaqaatigaa. Taamaaliorsinnaatitaavali? Lars-Emil Johansen ima oqarpoq:

- Søren Espersen Danmarkimi Kalaallillu Nunaanni kisermaassilluni naalakkersuisuunngitsoq siullermik oqaatigissavara, partiilli ilaat maannakkut naalakkersuisuutitaqartitsisoq sinniisuuffigalugu. Taassuma saniatigut oqaatigisariaqarpoq Søren Espersen partii ilaasortaaffiata avataatigut partiit allarpassuit isumaqatigiimmata uani apeqqummi, Søren Espersenilu kiserliortuulluni apeqqummi uani, nunatta Folketingimi ilaasortaatitaasa aappaat Lars-Emil Johansen oqarpoq.