Lars-Emil Johansen: Nunaateqarneq ineriartortittariaqarpoq

Politikkikkut piviusorsiorneruvoq, nunatsinni nunaateqarnikkut ineriartortitsinissanik periarfissat tapersersussallugit, taama oqarpoq Inatsisartut Aalisarnermut Nunalerinermullu Ataatsimiititaliaani ilaasortaq, Lars-Emil Johansen.

- Tusagassiutitigut saqqummiussuuneqartut malinnaaffigeqqissaarfigisinnaasimanngilakka. Taamaattorli nunalerinermut siunnersortip, Kenneth Høeghip, saqqummiussaasa ilaat tusarpakka, soorlu nunatta immummik imminut pilersortunngorsinnaanissaa, naatitanik imminnut pilersornitta annertusarnissaa, savaateqarnerullu marloriaatinngortinniarneqarnissaa.

Apeqqutit soqutiginarluinnarput. Aamma peqqinnissaq eqqarsaatigalugu, tassami naatitat akisoqisut nunatsinni ilaatigut pissarsiarineq ajornartarput. Pissarsiarisinnaasavullu assigiinngitsunik seqqitsarneqarsimasut eqqarsaatigalugit soqutiginartippara paaseqqissaassallugu sunarpiaq pineqarnersoq. Ataatsimiititaliap Sisimiuni sapaatip-akunnerata naanerani naapinnissaani Kenneth Høeghip saqqummiussai pillugit erseqqinnerusumik paasitinneqarnissarput siunnersuutigerusuppara, Lars-Emil Johansen oqarpoq.

Taanna aperaarput isummat taamaattut tapersersornerai, ima akivoq:

- Assorsuaq tapersersornartippakka. Avataaniit isumalluuteqarnitta millisarneqarnissaa sutigut tamatigut sulissutigisariaqarparput, aamma nunatsinni peqqinnarnerusunik nerisaqarnissamut periarfissavut pitsanngorsartariaqarpavut. Taamaattumik isummat taamaattut saqqummiunneqartut soqutiginarluinnarput qatangiinnartinneqarsinnaanatillu, Lars-Emil Johansen oqarpoq.