Lars-Emil Johansen nersualaarivoq

Folketingimi ilaasortat ullumi ataatsimiillutik aallartipput. Ileqqusoq malillugu marlunnik pisoqarpoq. Folketingimi siulersuisussanik qinersisoqarpoq kingornalu ministeriuneq naalagaaffeqatigiinneq pillugu nassuiaavoq.

Enhedslistenimeersut minillugit partiit sinnerisa Venstreneersoq Christian Mejdahl Folketingimi siulittaasussatut qinerpaat.

Kingorna ministeriuneq Anders Fogh Rasmussen oqalugiarpoq. Nunarsuarmi innuttaasut atugarisaasa naligiinnerulernissaat anguniarlugu suliniuteqartarnissaq annerusumik ministeriunerup oqalugiaatigaa. Naalagaaffeqatigiinnerlu pillugu nassuiaanermini minutsit marluk missaannai atorpai.

Nunatta folketingimi ilaasortaatitaata Lars-Emil Johansenip oqalugiartoq nersualaarpaa ministeriunerullu kiffaanngissuseq pillugu oqaasii nunatsinnut qanoq kinguneqartinneqarumaarnersut pissanngatiginerarlugit:

- Oqaatsit kusarnartorujussuit atorpai; kiffaanngissuseq affakuunnaanngitsoq, inuiaat kikkulluunniit oqartussaaffeqartut, nammineq inuiattut siunissartik pillugu oqartussaaffeqartut kiisalu nunani allamiut Danmarkimut nunasisut akulerutsinniarlugit ilungersuutit soraarummeernermik allaat ilaqartinneqartariaqartut ministeriunerup oqaatigai. Erseqqissarlugulu danskit oqaasiinik atuisinnaaneq ilanngullugu nunasisunit soraarumeerutigineqartariaqartoq.

Oqaatsit taama kusanartigisut nunatta Danmarkillu suleqatigiinneranni piviusunngortinneqassappata siunissarput isumalluarnarpoq. Maannakkut aporfeqartorujussuuvugut, aporfittalu annerpaartaraat Danmarkip tunngaviusumik inatsisaa. Taanna kalaallit taasissutiginikuunngilaat, taamaattorli nunasiaanerup nalaani akuerineqarmat qitornanngorsianngorfigisimallutigu. Ministeriunerup oqaatsini ilumoorussimappagit, kiffaanngissuseq inuiaallu pisinnaatitaaffiisa killilersorneqaratik pineqassappata namminersorneq pillugu ataatsimiititaliani sulinitsinni aaqqissuusseriaaseq sorleq atorlugu namminersulivikkusunnerluta toqqaaginnarsinnaalissaagut, Lars-Emil Johansen oqarpoq.