Lars-Emil Johansen: Nalunaarusiaq torinngilluinnarpoq
- Aalisarnermut apeqqut taama pingaaruteqartigisoq tupigusuutigaara taama torinngitsigisumik nalunaarusiortoqarsinnaammat. Inatsisit uniorlugit raajarniarnermi peqquserluttoqarneranik nalunaarusiaq pillugu Avataasiutinik piginneqatigiiffiit kattuffiata APK-p siulittaasua, Lars-Emil Johansen taama naliliivoq.
- Tupigusuutigaara apeqqut taama pingaaruteqartigisoq taama torinngitsigisumik suliarineqarsinnaasimammat. Taama tunngavilersugaanngitsigisumik ammalu uppernarsarneqarsinnaanngitsigisumik. Nassuiaat uppernarsaatinik amigaateqarluinnarpoq.
Tamanna pillugu Lars-Emil Johansen-ip suliamik Inatsisartut ombudsmandiannut ingerlatitseqqiisoqarnissaa siunniuppaa.
-APK-ip siulersuisuunerinut inassuteqarniarlunga eqqarsarpunga pisortat allaffeqarfiutaanni taama torinngitsigisumik sulisoqarsimanera ombudsmandip qanoq oqaasissaqarfigineraa paaserusullugu.
Lars-Emil Johansen aperigatsinni saaffiginnissuteqartoqarnera pissutigalugu misissuisoqarsimanera pissusissamisuuginnannginnersoq akivoq:
- Ilami misissuissagaanni missukkamut tunngasunik paasisimasallit attaveqarfiginissaat pissusissamisoorsimassagaluarpoq. Namminersornerullutilluunniit Oqartussat pisortaqarfitik misissuinermik ingerlataqartut saaffigisimanngilaat. GFLK Kanuaanaluunnit aamma attaveqarfigineqarsimanngillat. Akileraartarnermut qullersaqarfik aalisarnermullu pisortaqarfik attaveqarfigineqarsimallat. Aalisartut kattuffii aamma attveqarfigineqarsimanatik.
Nalunaarusiaq tunngavigalugu politiinut tunniussisoqarpoq tamannalu pillugu Lars-Emil Johansen ima oqarpoq:
- Nuannaarutigaara maannakkut Gorm Birkekjær Kjeldsen-ip naalunaaruteqarneratigut politiinit misissorneqartussanngormat, tassami APK-p ilaasortaanik taamatut unnerluussaqarneq kusananngilluinnarmat akuerineqarsinnaananilu.
Lars-Emil Johansen aamma oqarpoq nalunaarusiamik suliarinnissimaneq pillugu inatsisartut ombudsmandiannut suliakkiissuteqarsinnaanissaq pillugu APK-mi siulersuisuunerit aqagu saqqummiussaqarfigissagini.
