Lars-Emil Johansen ministeriunerup pilersaarutaanut akuersinianngilaq

Atlantikup avannaani folketingimi suleqatigiit oqaloqatigilluaqqaarniarput, Statsiminister Anders Fogh Rasmussen-nip akileraartarneq pillugu pilersaarutaa akuersissutigissagunikku. Siumut sinerlugu Folketinginmi ilaasortaatitap Lars-Emil Johansen-ip siunnersuut folketingimi taasisitsissutigineqalerpat itigartitsissutiginiarpaa, kalaallinut Danmark-imi najugalinnut iluaqutaasussaannginnammat. Lars-Emil Johansen statminister Anders Fogh Rasmussen-imit aggersarneqarsimanersut aperaarput.

”Naagga aggersarneqanngilagut”, Lars-Emil Johansen oqarpoq, ”tassa allatulaaq ikkatta folketingimi ilaasortat partiikkaartuupput uagullu atlantikup avannaani partiini pingasuni katersugaavugut taamaattumik allaanerulaartumik pisarpugut kisianni atorfissaqartinneqarsinnaanerput malunnarsiartuaalerpoq illutungeriit akornanni qularnanngitsumik taava pisariaqassappat aggeqquneqarnissarput piareersimaffigisariaqarparput ” Lars-Emil Johansen oarpoq. Aggeqquneqassagaluarunik oqaloqatigeqqissaartariaqarnerarput. ”Eqqassaqqissartariaqarpugut Kuupik Høgni uangalu pingasuulluta isumasioqatigeeqqissaarluta. Uagut naalakkersuinikkut eqqarsaataaserput tunngavigalugu imaaliinnaq akuerisinaanngilarput akissarsiaqqortunerit akileraarutitigut akileraarutikillisaaffigineqarnerat akissarsiakinnerillu mikinerusumik akileraarutitigut oqilissaaffigineqarnerannik siunertarineqarmat, minnerunngitsumik kalaallinut Danmark-imi najugalinnut sunniuteqarsinnaanera mikisuarakasiuvoq taamaattumik taamatut isikkoqartillugu taasineqassappat, akuersaartuunaavianngilagut,"Lars-Emil Johansen oqarpoq. Akuersaaqataasuussagutta allanik neqitalimmik sunniuteqartariaqarpoq kalaallinut savalimmiormiunullu iluaqutaasumik.

Naser Khaderip Ny Alliance-meersup atlantikup avannaani folketingimi suleqatigiinnik suleqatiserinnilluni neqerooruteqarnera Lars-Emil Johansen-ip paasisinnaanerarpaa kisiannili naalakkersuisuinngortitsinissamik oqalunnera paasisinnaanagu.