Lars-Emil Johansen: Kalaallit Nunaat oqallinnermi qitiulluinarpoq

Silap pissusaata allanngoriartorneranut tunngatillugu oqallinnermi Kalaallit Nunaat qitiulluinnartoq, Siumup politikkikkut oqaaseqartartuata Lars-Emil Johansenip oqaatigaa. Inuit Ataqatigiit sinnerlugit Inatsisartut Nunanut Allanut Sillimaniarnermullu Ataatsimiititaliaanni ilaasortap Josef Motzfeldtip naalakkersuisunik isornartorsiuineranut akissuteqarluni, Lars-Emil Johansen oqarpoq, Kalaallit Nunaat silap pissusaata allanngoriartorneranut tunngatillugu oqallinnermut akuulluinnartoq, naalakkersuisullu nunatta akuulluinnarnissaa suliniuteqarfigigaat oqaatigalugu.
Allattoq Mads Lynge
maajip 13-at 2008 17:39

- Nunanut allanut politikkikkut naalakkersuisut annertoorujussuarmik ingerlataqarput. Minnerunngitsumik silaannaap kiatsikkiartornera eqqarsaatigalugu suliat pillugit. Al Gorep filmiliaa kisiat piinnarnagu nunatsinni filmiliarineqarsimasoq "Global Warming dogsled Expedition"-imik taaneqartoq, KNR-ikkullu takutinneqareersimasoq, Ilulissani ataatsimiinnissami takutinneqartariaqartoq. Sermersuup aakkiartornerata akornutinik taamaallaat nassataqaannarani periarfissanik nutaanik aamma ammaassisoq filmip taassuma takutippaa, Lars-Emil Johansen oqarpoq.

Assersuutitut taavai Uummannamiit Diskobugtip tungaanut qimussimik nutaamik aqqusinniortoqartariaqarsimasoq, aatsitassallu Sermersuarmit siornatigut asserneqarsimasut piiarneqarnissaannut pilersaarusiortoqarmat.

- Kalaallit Nunaat oqallinnermi qitiulluinnarpoq. Nalunngilarput Danmarkip nunanut allanut ministereqarfia aqqutigisariaqarlutigu, inatsimmut tunngaviusumut aalajangersakkat pissutigalugit. Taamaakkaluartoq kalaallit politikerit naalakkersuisullu qitiusumik inissisimapput, silarsuarmioqatitsitsinnit oqaloqatigiumaneqartarmata, Siumup politikkikkut oqaaseqartartua Lars-Emil Johansen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq