Lars-Emil Johansen isornartorsiorneqangaatsiarpoq

Inuit Ataqatigiit Lars-Emil Johansenip ullaaq Radioavisimi oqariartuutai Inuit Ataqatigiit isumaqatiginngilaat.

Lars-Emil Johansenip siunnersuutigaa Kalaallit Nunaat Danmarkimut ataatsimoortumik tapiissutinik siunissami immaqa akiliisalissasoq.

- Kalaallit Nunaat ulloq taanna namminersulivissimalluni ataatsimoortunik tapiissutinik pisarunnaarpat, nunarput arlaannaatigulluunnit pisussaatitaanngilaq 1 oorimilluunnit akiliissalluni, IA-p Folketingimut sassartitaa, Juliane Henningsen tusagassiutinut allappoq.

- Allarluinnaassaarli Danmarki aningaasatigut tapersersorneqarnissaminik pisariaqartitsilluinnarpat, Juliane Henningsen nangilluni allappoq.

- Inuit Ataqatigiinni aamma isumaqanngilagut ataatsimoornerput suleqatigiinnerpullu aningaasatigut Nunani Pilersitanit nalilinnit tamakiisuniit, tassa BNP-miit procentimik aalajangersimasumik akilersuinikkut ingerlateqqissinnaasoq.

- Allarpassuartigut suleqatigiinneq naalagaaffeqatigiissimanerlu pitsaasumik ingerlateqqinneqarsinnaapput, Juliane Henningsen naggasiivoq.