Lars-Emil Johansen-ip ataatsimiinneq iluarisimaarpaa
Lars-Emil Johansen-ip inatsisartut nunanut allanut sillimaniarnermullu ataatsimiititaliaani siulittaasup danskit nunanut allanut ministeriannik ippassaq ataatsimeeqateqarnini iluarisimaarpaa.
Ataatsimiinnermi isumaqatigiissutigineqarpoq ataatsimiititaliortoqarnissaa, ataatsimiititaliarlu issittumi soqutigisat pingaarnerutillugit ukiortaap tungaanut suliaqassaaq. Siunertarineqarpoq nunat assigiinngitsut akornanni issittoq pillugu assigiimmik oqariartuuteqarnissaq.
-Ataatsimiititaliortoqarnissaa iluarisimaarpara, isumaqarpungalu ataatsimiinneq iluatsilluartoq, Lars-Emil Johansen oqarpoq, naqissuserpaalu naalakkersuisut ataatsimiititaliap nunanullu allanut ministerip akornanni akerleriissuteqartoqanngitsoq.
Ataatsimiititaliamik pilersitsisoqarnera Canadap issittumi suliaqarnerulerneranik peqquteqanngitsoq, nunanut allanut ministeri oqarpoq.
Sullualukkut aningaasarsiutigalugu angalasoqarnerulernissaata 2015-mi piviusunngorsinnaanera, silaannaap allanngoriartornerata ilimanarsisippaa, tamannalu aqqummik soqutiginarnerulersitsivoq.
