Lars-Emil Johansen: Inissinneqarsimasut qimaanerat toqqissisimananngilaq
Siumup folketingimut ilaasortaatitaata Lars-Emil Johansenip immikkoortortat tarnimikkut nappaatilinnut pineqaatissinneqarsimasunut inissiivigineqartut, qimaaffigineqarsinnaajunnaarlugit aaqqitaannginnerat toqqissisimanartinngilaa.
Allattoq Elisa Isaksen
aggustip 08-at 2010 12:03
- Nunatsinni isumannaallisakkanik inissiisarfeqanngimmat suli, Danmarkimi tamakkununnga inissiisoqartarpoq. Danmarkimut inissiineq isumannaatsuunngippat, tamanna toqqissisimananngilaq, Lars-Emil Johansen ritzauimut taama oqarpoq.
Taamatut oqaaseqarnera folketingimut ilaasortat amerlanerussuteqartut, SF-imeersut, Socialdemokratit aamma Dansk Folkepartimeersut isumaqatigaat, taamaattumik tarnimikkut napparsimasunut pineqaatissinneqarsimasunut inissiisarfinni isumannaatsuuneq arlaannaannulluunniit attuumassuteqanngitsunit misissisorneqarnissaa piumasaraat.
Danmarkimi tarnimikkut napparsimasunut inissiisarfinnit qimaasartut qanoq amerlatiginerat pisortanit kisitsisaatigineqanngitsoq, Ritzauimit oqaatigineqarpoq.
