Lars-Emil Johansen: Imartatsinnik nakkutilliinerusariaqarpugut

Canada Issittumi sakkutuuliinerusariaqartoq, Canada-p ministeriunerata, Stephen Harperip, Nunavumi tikeraarnerminut atatillugu oqaatigaa. Peqatigitillugu issittumi angallannikkut periarfissat annertuneruleriartortillugit Canada-p issittortaani imartap nakkutigineqarnerulernissaa ujartorpaa.

Nunatsinni inatsisartut nunanut allanut sillimaniarnermullu ataatsimiititaliaata siulittaasua, Lars-Emil Johansen, isumaqarpoq, imartamik nakkutiginninnerulertariaqartugut:

- Apeqqut taanna pillugu ataatsimiititaliami oqaluuserinneqqissaartariaqarpugut. Periarfissarlu siulleq atorlugu, nunatta nunanut allanut ministeriata, Danmarkillu nunanut allanut ministeriata aggustip 21-ianni ataatsimiinneranni apeqqut taanna oqaluuserineqartariaqartoq, Lars-Emil Johansen oqarpoq.

Imaappa Danmarkip nunattalu Issittup imartaanik nakkutiginninnnerulernissaat takorloorneqarsinnaassasoq?

- Pisariaqarluinnarpoq. Nunatta inissisimanera pisuussutaannartigut pingaaruteqanngilaq, sakkutooqarnikkullu pingaaruteqanngilaq, kisianni aningaasarsiornikkut annertoorujussuarmik pingaaruteqaleraluttuinnartussaavoq Issittup imartaasa sikueruttalernissaat ilisimatuut siulittuinerat najoqqutaralugit taamatut Danmark Kalaallit Nunaallu marluullutik eqeersimaaqqissaartariaqarput, oqartussaaffinnik Canadaminngaanniit arsaarneqannginnissarput sillimaffiginiarlugu, Lars-Emil Johansen oqarpoq.

Sakkutuut Nunavummi qeqertaaluup kangiani kitaanilu imartaq nakkutilliivigissavaat, nakkutilliinerlu Canadap issittup imartaanut piginnittussaaneranik naqissusiinertut paasineqartariaqartoq, Stephen Harper Iqalunniinnermini ilanngullugu oqarpoq.