Lars-Emil Johansen: DR-ip piviusulersaarusiaa illuinnaasiorpallaarpoq
DR piviusulersaarusiaa ”Kalaallit Nunaannit Qimarranneq” maannamut kalaallinit annertuumik aalassassimaarutigineqaqisup takutinneqareersorlu Lars-Emil Johansen-ip annertuumillu piviusulersaarusiamut peqataaffigineqartumit akerlerineqarpoq.
- Aatsaat taamak aallakaatitassiamik illuinnaasiortigisumik takuvunga. Kalaallit Nunaanni pigisavut aap, miserratigissanngilagut! Kisianni taakkuinnaaviit soorlu Kalaallit Nunaanni allanik soqanngitsoq. Assigiinassagaluarpaa Danmarkimi pissutsit pillugit nunatsinni filmiliortoqartuupat, Tv-kullu aallakaatitsisoqartuupat Voldsmosemi ajornartorsiorferujussuarmi Kalaallit Nunaanni aallakaatinneqartuuppat oqarlunilu tassa Danmarki, Lars-Emil Johansen oqarpoq.
Qujasariaqanngilagut ajornarnartorsiut ilumoortumik takutinneqarmat?
- Soorunami ilumoortut taakkuinnaaviusimasuuppata aap!
Kisianni Kalaallit Nunaat taakkutuaannaangilaq. Kalaallit Nunaanni ingerlalluartoqarportaaq, tamakku aamma takutinneqartariaqaraluarput, Lars-Emil Johansen oqarpoq.
Piviusulersaarut qanoq kinguneqarsinnaava?
- Ajornartorsiutit annertunerusumik sulissutigisariaqarpavut. Isumaqarpunga aamma imigassamik ikiaroornartumillu inuiaqatigiinni annertunerujussuarmik ajornartorsiutigineqartut ullumikkornit akiorniarlugit suliniuteqartariaqartugut. Taammaattumik katsorsaanisaamut periarfissat annertusarneqartariaqarput, Lars-Emil Johansen oqarpoq.
Taammaappat DR-ip piviusulersaarusiaa eqeersaataava?
- Naluara uanga taanna arajutsisimanngisaanarpara. Nunatsinni imigassamik ikiaroornartunillu ajornartorsiuteqarneq. DR-ip taamanna saqqummiummagu taanna ajornartorsiutaatinngilara. Piviusulersaarutitut taanneqassaguni taava Kalaallit Nunaat tamakkiinerusumik takutinneqartariaqarpoq ajortortai kisimik takutillugit piviusulersaarutitut taaneqarsinnaangilaq, Lars-Emil Johansen oqarpoq.
DR-ip Piviusulersaarusiaa Kalaallit Nunaannit qimarranneq pillugu Hans Enoksen oqaaseqartinniarsimagaluarparput. Hans Enoksennili aataat aqagu oqaaseqarniarluni tusagassiutinut nalunaaruteqarpoq, unnummut aattaat Kalaallit Nunaannit qimarranneq kalaallisut oqaasertaqarluni takutinneqassammat.
