Lars-Emil Johansen akiliisussanngorlugu eqqartuunneqartoq
Eqqartuussivimmiit nalunaarutit, Nuup eqqartuussivianeersut, Sermitsiap pissarsiarisimasai naapertorlugit, eqqartuussineq pisimavoq Lars-Emil Johansenip Aningaasaqarnermut nunanullu allanut Naalakkersuisunngortitaanerata aqaguani.
Lars-Emil Johansen kilisaataatileqatigiit APK-p siulittaasuatut inissisimagallarami kortimik atornerluisimaneranut tunngapput. Danmarks Radiumiit aallakaatitassiaq piviusulersaarut “Kalaallit Nunaanniit qimaaneq” KNR-TV-kkut pingasunngorpat nalunaaqutaq arfineq marluk qiteqquppat aallakaatinneqartussaq misissuitillugu pisimasoq paasineqarpoq.
Lars-Emil Johansen Sulisitsisut Kattuffiannit unnerluutigineqarsimavoq, ilaatigut inuit marluk Danmarkimiit Nunatsinnukarnerat akilerneqarsimanngimmat.
Eqqartuussinerup ingerlanneqarnerata nalaani Lars- Emil Johansen eqqartuussivimmiinngilaq.
Lars-Emil Johansen suli akiliisimangitsoq, Sulisitsisut Peqatigiiffiat nalunaarpoq.
- Eqqartuussivimmiit akiliisussanngortitaareermat akiliinissaa naatsorsuutigaarput, Sulisitsisut Peqatigiiffianni pisortanngortussaq, siunnersorti Henrik Leth oqarpoq.