Langbølgekkut aallakaatitsinerit Kujataani tusarnaarneqarsinnaalissapput
Tassami Danmarks Radiup langbølgekkut aallakaatitsisarnini aallarteqqinniarpaa. Radiukkut taamatut aallakaatitsisarneq 2007-imili taamaatinneqarsimagaluarpoq.
Danmarks Radiup mellembølgikkut aallakaatitsisarnini juunip 27-anni taamaatissavaa, tassuunalu aallakaatinneqartaraluartut langbølgikkut aallakaatittalissallugit. Taamaalilluni aallakaatitanik qallunaatuunik Europap annersaani, Nordsømi, Savalimmiuni, Islandimi Nunattalu Kujaterpiaani tusarnaartoqarsinnaalissaaq.
Radiukkut aallakaatitsissut napparummit nutaamit Kalundborgip eqqaaniittumit aallakaatinneqartassaaq, tusarnaartartussatut eqqarsaatigineqartut tassaanerullutik, lastbiilinik ungasiliarlutik angallassisartut, aalisartut aamma sunngiffimminni immakkut angalaartartut aamma qallunaat nunani allani najugalllit, Danmarks Radio taama ilisimatitsivoq.
Danmarks Radiup mellembølgikkut aallakaatitai ullutsinni tusarnaarneqarpiarneq ajorput, tamannali sullissisussaanermik pisussaaffeqarnermik EU-milu malittarisassanik tunngaveqaluni pisarluni. Langbølgikkut aallakaatitat 243 kHz AM-ikkut tusarnaarneqarsinnaalissapput.
