Nakorsaaneq mittarfimmi pisoq pillugu: Nunatsinni corona-virusertoqanngilaq
Nuummi ambulancini sulisut illersuutinik atisalersorsimasut napparsimasumik tallimanngormat mittarfimmut aallernerat nittartakkakkut attaveqaqatigiittarfikkut facebookikkut oqallitsitsingaatsiarpoq.
Politeeqarfinni pisortaq aamma nappaatit tunillaattartut pillugit ataatsimiititaliami ilaasortaq, Svend Foldager tallimanngornermi KNR-ip pisoq pillugu oqaaseqartinniaraluarpaa, taannali pisumut ilisimasaqanngilaq. Pisorli pinartuusimagaluarpat ilisimatinneqarsimassagaluarluni taanna oqarpoq.
Mittarfimmi pisumut tunngatillugu politiit kommunillu upalungaarsimasui immikkut nalunaarfigineqarsimanngillat.
Video: Paalu Møller
Nunatsinni nakorsaanerup Henrik L. Hansenip corona virusiunngilluinnartoq ataasinngornerup ullaap tungaani KNR-imut erseqqissaatigaa.
- Corona virusimut attuumassuteqanngilluinnarnera paasissutissiissutigisinnaavara. Nunatsinni corona virusertoqarneranik ersiuteqartoqarnikuunngilaq.
Henrik L. Hansen oqarpoq.
- Immikkut ittumik tallimanngormat mittarfimmi pisoqanngilaq. Nappaatit suulluunniit tuniluussinnaasut soorlu nualluutiniit tuberkulosinut, allanut tuniluutinnginnissaat anguniarlugu periuseqartarpugut.
Ambulancit tallimanngormat aasaa sumik nappaateqarnersoq oqaluttuussinnaavinga?
- Kikkut ataasiakkaat nuutsinneqarnersut naluneqarneq ajormata paasissutissat inunnut ataasiakkaanut tunngassuteqartut oqaatigisinnaanngilakka.
Tuberkulosiua?
- Pisussaaffeqanngilanga inuup ataatsip suna nappaatigineranik paasissutissiissallunga, Hans L. Hansen oqarpoq.