Landskarsi sinneqartoorpoq
Kalaallit inoqutigiit aningaasartuutaannut naatsorsuutit Inatsisartunut ippassaq tunniunneqarput.
Aningaasaqarnermut Naalakkersuisup, Maliina Abelsenip, naammagisimaarinneqaluni saqqummiuppaa, Namminersorlutik Oqartussat 49 millionit koruuninik ingerlatsinermut sinneqartooruteqartut.
- 2011-mut angusarineqartut erseqqissaqqippaat, Naalakkersuisut akisussaassuseqartumik aningaasaqarnikkut ingerlatsisut, Maliina Abelsen oqarpoq, aamma oqarluni, ingerlatsinermut oqimaaqatigiissitsineq aaqqissuusseqqinnermut aallartilikkaminnut pingaarutilimmik tamanna tunngaviusoq.
Naatsorsuutit aamma takutippaat, uuliamik ujarlerluni 2011-mi ingerlatsinerit Nunatta karsianut akileraarutitigut aningaasarpassuarnik immikkut ittumik pissarsissutaasut.
Taakkunannga 10 millionit koruunit peqqinnissaqarfimmi utaqqisunut allattorsimaffiit ikilisarniarnerannut immikkut ittumik suliniutinut, aamma Aasianni, Uummannami, Tasiilami, Qaqortumi Sisimiunilu ilinniartut ineqarfiinut, atuartullu angerlarsimaffiinut, aningaasaliissutigineqarput.
- Aningaasaliissuteqarnikkut tassuuna takutipparput, siumut sammisumik isiginnissinnaanerput, peqatigitillugulu ulluinnarni ingerlatsineq tamaat nakkutigalugu, Maliina Abelsen, imminut tatigeqaluni, oqarpoq.
