Landis Tour de Francemi ajugaanerminik arsaagaavoq
Cykelerluni sukkaniuttarnerit nunarsuarmi sakkortunersaattut taaneqartartumi, Tour de France-imi, ukioq manna ajugaasoq, Floyd Landis, unammisarnernit anisitaavoq.
Landisip pissassaatinik inerteqqutaasunik atuisimanera aammik quumillu misissuinerit misileqqinneqarneranni b-prøvemik taaneqartartumi paasineqarpoq. Misissuinerit inernerisa, ullaap tungaagut saqqummiunneqartut, takutippaat Landis pissassaatitortarsimasoq.
Floyd Landis Team Phonak-imit erniinnaartumik soraarsitaavoq, ukiuni marlunni pissartanngorniunnernut peqataaqqusaajunnaarluni kiisalu Tour de France-imi ajugaasimanerminik arsaagaalluni.
Landisili suna tamaat atorlugu annanniarsarigaluarpoq, nittartakkamini allaat nalunaarutigalugu nunarsuarmi cykelerlutik sukkaniuttartut kattuffiata, UCI-p naammagittaalliornermut malittarisassai atorlugit, pinngitsuunini uppernarsarumaarlugu.
Floyd Landisip pissassaatinik atuisimaneranik paasisat tunngavigalugit atuisumuinnaq kinguneqartitsisarneq allanngortinniarneqalerpoq, assersuutigalugumi Danskit cykelerlutik unammisartut peqatigiiffiata piumasaraa, paasineqartup holdeqatai tamarmik aamma pillarneqartalissasut.