Løvit Kunngiata filmiliaqqinnera pillugu naliliisartut isumaqatigiinngillat

Disneyp ukiut 25-t matuma siornatigut filmiliaata ilisimaneqarluartup “Løvit Kunngiat”a filmiliareqqinneqarnera isumaqatigiinngissutigaat.

Oqaatsit “alutornartorsuaq” aamma “pikkunaatsoornartoq” atorlugit titartakkanik qarasaasiakkut uumassusilerlugit filmiliaq danskit aviisiini allaaserineqarpoq.

Berlingskemi naliliisartup Sarah Iben Almbjergip assut torrallagaanerarpaa periarfissanillu arfinilinnit tallimanik ullorialiilluni.

Teknologiikkut torrallataanera nersorpaa.

- Løviaraq inoorlaaq nersorniarlugu uumasut katersuunnerat filmimut aallarniutaasoq naammassisorlu allaat tunuarsimaarluni qulartoq tunniutiinnartariaqarpoq Verdensnaturfondenimullu (Pinngortitaq pillugu nunarsuaq tamakkerlugu suliniaqatigiiffik) ilaasortanngornissaminut piareerluni.

Berlingskep naliliisartua Soundvenuep naliliisartuanit taperserneqarpoq, taanna pitsaanerpaamik naliliigami, periarfissanit arfinilinnit arfinilinnik ullorialiilluni.

Aatsaannarlunga

  "Løvit Kunngiat" tassaavoq filmiliornerup silarsuaani ineriartornermik allanngortitsisoq, sekuntillu siulliit qulit ingerlanerini uannik aatsaannartitsisoq, Soundvenuep naliliisartua Lise Ulrich allappoq.

Politikenip naliliisartua Kim Skotte taama nersuitiginngilaq. Kim Skotte isumaqarpoq filmi tiguartinnartumik alutornassuseqanngitsoq piviusorpalaanngippaallartumillu eqqumiilluni, periarfissanillu arfinilinnit pingasunik ullorialerlugu.  

- Sunaluunniit alutornaraluaruni imaanngilaq soqutiginartoq, allappoq.

- “Løvit Kunngiata” nutaaliap kusanartorsuup akunnakusoornartua pikkunaatsoornartortualu tassavoq apeqqutip ataatsip akineqarnissaa amigaataammat, tassa: Sooq?

Titartakkat qarasaasiakkut uumassusilikkat pikkunaatsoornartut

Dagbladenes Bureaumi suli sakkortunerupput. Tassani Eydie Laramorep ilisimaneqarluartuliaanik ilitsersuisup Jon Favreaup filmiliareqqiinera periarfissanit arfinilinnit marluinnarnik ullorialerneqarsimavoq.   

- Immikkoortut killitsinnarnerpaaniartut minnerpaannguamilluunniit qullipiffiusinnaanngillat.

- Filmiliami tassani ataatsimilluuniit pissusissamisoortoqanngilaq, naliliisartoq Helle Sihm allappoq.

Filmit pillugit atuagassiap Ekkop naliliisartua Patricia Smollerup aamma qiimmattarpallaanngilaq. Nipitaa Hans Zimmerimit suliarineqartoq alutornartorsuunerarpaa, isiginnaartitsisartullu oqalunnerisa filmi annaakkaat isumaqarluni.  

- Uumasut titartakkat qarasaasiakkut uumassusilikkat pikkunaatsoornarneri isiginnaartitsisartut nipiliinerisa illuatungulerlugit inuttaasullu nuannareqisavut titartakkanik filmialiatoqqamit nalunngisavut kinaassusilerpaat, allappoq periarfissanillu arfinilinnit sisamanik ullorialiilluni.  

"Løvit Kunngiat" Nuummi Katuami takuneqarsinnaavoq.