Mira New Yorkimi coronap eqquinerani: Nipaaqaaq
Illoqarfik sininneq ajortoq: New York. Mira Kleistip najugaqarfia.
- Pissanganaqaaq maani najugaqarluni, misigisassaqarnartuaannarluni, Mira Kleist oqarpoq.
Taanna New Yorkimut 2018-imi nuuppoq. Mira Naalagaaffiit peqatigiiffiit ataanni nunat inoqqaavi pillugit ilisimasallit allaffianni siunnersortaavoq.
Qaammatilli kingulliit marluk allaaneroqaat. Isiginnaartitsinerup silarsuaa alutornartoq, unnuit nipilersorfiusut, angallannerujussuarlu aqquserngit inoqannginngerannik taarserneqarput.
Times Square inoqanngilaq
New York coronavirusimit eqqugaaqqanerpaat akornanniippoq, inuit 18.076-it tassani toqqutigereermassuk.
- Ilimaginikuunngisaannarpara ullormiit ullormut inuunera taama allanngortigissasoq, Mira oqarpoq.
Tassami neriniartarfiit, pisiniarfiillu matoqqapput. "Nunarsuullu allanngorfia" Times Square inoqanngilaq.
- Assut eqqumiippoq, nipaaqaaq. Nalinginnaasumik nipinik ulikkaartarpoq, sanasut aqqusinermi nipilersuummik tusarnaartut, inuppalaarneq.
Mira qaqutiguinnaq anisarpoq. Inigisani qimappiarneq ajorlugu oqarpoq.
Pisiniarfinnut niuerniarluni nakorsaataarniarfimmukarluniluunniit anillatuaraangami inuit kiinnamikkut assiaqutillit arlaatigulluunniit illersuutillit takusarpai.
- Quianalaarpoq, tassami inuit qungujulanersut takusinnaanneq ajorpara.
- Asanninneq siammarteruk, coronavirusiunngitsoq
Aqqusineq qalipagaqartiterlunilu qiimmassaatinik allagartaqartiterpoq.
- Inuit neriusaanik allanilluunniit qiimmassaatinik imaluunniit peqqinissamik sulialinnik sapiitsuliakkiaralugit qalipaasimapput, qiimmassaatinillu allassimallutik, soorlu: Asanninneq siammarteruk, coronavirusiunngitsoq.
Unnuit tamaasa arfineq marlunut aamma aalajangersimasumik pisoqartarpoq.
- Inuit unnuit tamaasa arfineq marlunut igalaatik ammariarlugit assatik pattaallugit peqqinnissaqarfinni sulisut, angallassisut pisiniarfinniluunniit sulisut qiimmassartarpaat, Mira Kleist oqarpoq.