Løkke: Danskit oqaasiinik pisinnaasat pitsanngorsarnissaannut Kalaallit Nunaat ikiuuttariaqarpoq

Danskit ministeriunerat Folketingetimi apeqqarissaarfigineqarami Siumut Folketingetimut ilaasortaatitaanit Aleqa Hammondimit apeqqut taama akivaa.

Taassuma kalaallit Danmarkimiittut oqaatsitsigut ikiorneqarnissaat ujartorlugu apeqquteqarpoq.

- Nalunngilara, nunanit allaneersut qallunaatut oqalussinnaanissaannut Danmarkimi naalakkersuisut sakkortuunik piumasaqaateqartut. Naalagaaffimmi innuttaasugut oqaatsit ajornartorsiutigaat aamma, ministeriuneq qanoq iliorniarpa, naalagaaffeqatigiinnermi innuttaasut ilaat danskit oqaasiinut ajornartorsiuteqartut malinnaasinnaanissaat anguniarlugu? Ministeriunermit suliniutinik takusaqassaagut?, Siumut Folketingemut ilaasortaatitaa Aleqa Hammond, marlunngormat minitseriunerup apeqqarissaarfigineqarnerani taama aperaaq.

Ministeriunerli Lars Løkke Rasmussen apeqqut Kalaallit Nunaannut utertillugu akivaa.

- Aap, qujanaq. Siulliullugu oqaatigilara oqaatsinik pisinnaasaqartitsinermut apeqqut ilinniartitaanerup qanoq aaqqissuunneqarsimaneranit immikkoortinneqarsinnaanngimmat, tamannalu Kalaallit Nunaata akisussaaffigilernikuuaa, taamaammallu Kalaallit Nunaanni aaqqitassaalluni.

Ministeriuneq naapertorlugu danskit naalakkersuisuisa ajornartorsiut aaqqiiviginiarlugu iliuuseqarsimapput, Kalaallit Illuutaat Danmarkimiittut 2016-imi 4 millionit koruuninik tapiiffiginerisigut.

Aningaasat kalaallit Danmarkimiittut ilaatinnerulerneqarnissaannut atussapput, soorlu qallunaatut ilinniartitsinermut atorneqarsinnaallutik.