Mæslinginik nappaalasoqarsinnaanera nakorsat ernummatigigaat
Angajoqqaat meeqqatik akiuussutissamik MFR-imik taaneqartartumik kapitinnissaat puigortarpaat, nappaalasoqalersinnaaneralu Nuummi Dronning Ingridiup Peqqissaaviani sulisut ernummatigaat. Aviisi Sermitsiaq.ag taama allaaserisaqarpoq.
Kisitsisit nutaat takutippaat meeqqat 15-it sinnerlugit qaammateqartut affaasa missaannaat akiuussutissamik kapineqartartut, tamannalu 95 procentit kapitissimanissaannik taamaalillutillu nappaalanissaminnut qulakkeerneqarnissaannik kissaateqarnermit annikinneroqaaq.
- Inuit mæslinginik tunillatsissimasut ukiut tamaasa takkuttarput, ilaannikkullu annikinnerusumik nappaalasoqalersarluni. Danmarkip Kalaallillu Nunaata akornanni angallattoqaqimmat, inuit mæslinginut akiuussutissamik kapitissimanngitsut tunillanneqariaannaapput. Taamaattumik pingaaruteqarluinnarpoq mæslingimik nappaalanissaq pinngortoortissagaanni meeqqat 15-it sinnerlugit qaammateqartut akiuussutissamik MFR-imik kapitinnissaat, Dronning Ingridiup Peqqissaaviani nakorsiartarfimmi nakorsaq, Michael Lynge Pedersen, Sermiatsiaq.ag-mut oqarpoq.
Meeqqat nappaataat mæslingi tuniluutiasupilussuvoq, ilaannikkut annertuumik ajuuteqalernissamik toqumilluunniit kinguneqarsinnaalluni. Ingammik inersimasut sakkortuumik eqqugaasarput. Maanna akiuussutissanik kapitittarnerit amerlanerusut aqqutigalugit minnerpaaffimmiitinneqarpoq, meeqqat 15-it sinnerlugit qaammatillit akiuussutissamik kapisarnerisigut.
Dronning Ingridiup Peqqissaavia arfininngornermi februaarip sisamaani immikkut ittumik ammassaaq
meeqqat 15-it sinnerlugit qaammatillit inniminneeqqaaratik MFR-imik kapitissinnaallutik.