Københavnip kommunia Dell-ilu suleqatigiilissapput

Københavnip kommuniata qarasaasialeriffimmik Dell-imik suleqateqarniarluni aalajangiuppaa. Suleqatigiinnissamut isumaqatigiissuteqarnermut Dell-ip serverii, tassa qarasaasiakkut qitiusumik attaveqarfii, nutaat, qanganitsaniit kallerup inneranik atuinikinnerunerat, taamaalillutillu avatangiisinik mingutsitsinnginnerunerat, pissutigineqarput. Taassumalu saniatigut Dell-ip Indiami orpinnik 500-nik naatitsiniarnera peqqutaaqataalluni. Dell-ip pisortaata, Henrik Stanley Madsenip periutsimik aningaasatigut iluanaaruteqarnermik kinguneqarnera nassuerutigaa, tassami mingutsitsinaveersaarlutik saniatigullu orpinnik naatitsinermikkut sullitarisinnaasaminnut orniginarnerusaramik. Sullitamillu mingutsitsinaveersaartunik suleqateqarnertik nittarsaallugu aamma taakkua suleqatigisinnaasaminnut orniginarnerulersinnaammata. Orpinnik 500-nik naatsitsinitsigut ataatsimut isigalugu malunnaateqarpianngikkaluarluta mingutsitsinaveersaaqataanerput nittarsaassinnaavarput, Henrik Stanley Madsen oqarpoq.

Nakorsaatiliorfimmi NOVO-mi aamma mingutsitsinaveersaarneq nittarsaallugu iluanaarutiginiarneqarpoq. NOVO DONG-energimit nukissiamik sipaarniarnikkut siunnersorneqartarpoq, taamaammallu NOVO imaani anorisaatinit nukissiamik pilersorneqassalluni pituttornikuuvoq. NOVO-mi aningasaqarnermut akisussaasup nassuerutigaa mingutsitsinaveersaarnertik iluanaarutiginiarsinnaallugu. NOVO aalajangersimavoq ukiut qulit ingerlaneranni nukissiamik atuinertik 10 procentimik annikilliniarlugu. Siunniussartilli anguniarlugu suliffeqarfiup iluani nukissiamik atorluaanerunikkuinnaq angusinnaannginnamikku, kallerup inneranik pilersorneqarnertik nukissiorfimmit aamarsuartortumit pisarunnaarlugu mingutsitsisanngitsumit pisalertariaqarlugu.