Københavnimi nunap ullaaq sajunnera kalaallip misigalugu tupaatigisimaqaa.

- Najugaqarpugut Frederiksundsvejimi, Nørrebro-p qulinnguani, Nørrebro stationimut ungasinnata. Siullermik aallartimmat malugivara sofamiillunga sofa aalalersoq. Taava una inigisarput kaluittarmat isumaqaqqaarsimagaluarpunga sofarput aallartiffigalugu kaluilersoq. Kisianni sekundtip missaa qaangiuttoq isumaliulerpunga; allarujussuarmik pisoqarpoq, taavalu ilaqutatsinnik tikeraartoqaratta nunatsinnukariartorluni aqqusaartoq, taanna qaatimassutigigatsigu, filmiliaminillu takutsitseriarmat. Taanna isiginnaagarput unitsillugu assut uippallersimavugut. Illu allaannginnami nakkaassasoq, tassami qammasissiaagami, ima aalatigigami allaat assiliaatigut ilisaatigullu nakkakaallutik. Aamma amitsukujuumik fjernsyneqaratta uppissanasualugu isigiinnaleraluarpara annilagalugu. Taava opgangitsinni aniavugut, sunaaffa aamma affarlivut annilaarsimallutik anillakkamik. Aperalugit susoqarnersoq, - ilami biilinik aportoqanngimmat aamma, - uagummi aatsaat misigisaqaratta taamatut. Ukua affarlivut parkistanimiut oqarput nuna sajunnerarlugu. Illorsuaq qulliungami sajuttorujussuullunilu, alliusuugutta malugerpiarnavianngikkaluaripput nassuiaappaatigut, aamma tamatuminnga misilittagaqareersimagamik, Indalik Høegh oqaluttuarpoq, nangillunilu.

- Assut tupannarpoq inuuniaammernarlunilu, 5 sekundinik sivisussuseqarneraramikku tusagassiuutit, kisianni uanga, immaqa nunap sajunnerata maligaasaasa ingerlaarneri, sivisunerulaartutut misigaara, taavalumi illu sajungaatsiarami allaannginnami nakkaaginnalillartoq. Taavali unimmat assorsuaq periusissaaleqisimavugut sussanerluta, anissanerluta, nangeqqissanersoq, assut uippallernarpoq, Indalik Høegh oqaluttuarpoq.

>Siornatigut takorloornikuuiuk inuuninni nunamik sajuttumik misigisaqarsinnaanissat?<

- Taamatut takorloornikuunngilara, kisianni tusagassiorfitsigut isiginnaartakkakka soorlu Tyrkiekkuni Parkistanikkunni allanilu nunat sajussimasut takutinneqaraangata takullugit sakkortusarput, kisianni nammineq eqqarsaatigisimanngikkaluarpara tamanna misigiumaarnerlugu, Indalik Høegh Københavnimiit taama oqaluttuarpoq.