Københavnimi Kalaallit Illuutaat 1.800-t iserpaat

Kalaallit Illuutaata silataani atisanik Isaksen Desigimeersunik takutitsisut alutorsaatigineqaqaat.

Iluani ilaatigut filmi Tro, Håb og Grønland Danmarkimi takuteqqaarneqarpoq.

Filmimi kulturimut tunngasuusumi eqqumiitsuliortut arlallit oqaluttuartuupput.

- Angajoqqaama Kalaallit Nunaat suli asaqaat, inuuneralu tamaat nuna tupinnartunik misigisaqarfigisimasartik uanga eqqaamanngisara pillugu oqaluttuuttuartarpaannga, ilitsersuisoq Ivalo Frank, Kalaallit Nunaanni inunngortuusoq, Danmarkimi alliartorsimasoq maannalu Tysklandimi najugaqartoq oqarpoq.

Filmip takuteqqaarnerani najuuppoq. Assut pissangassutigaa qanoq isiginnaartut filmiliaminik naliliissanersut.

- Danmarkimi kalaallinut atasuunera pillugu maani takuteqqaarnera pingaarteqaara. Tysklandimi nunaniluunniit allani Kalaallit Nunaanniissimanngitsut filmi isiginnaaraangassuk, qanorluunniit oqarsinnaasarpunga, isummersorfigineqarnanga. Maanili Kalaallit Illuutaanni kikkut tamarmik Kalaallit Nunaannik ilisimannipput isummersorsinnaallutillu. Taamaammat filmilioriaatsima misilitsinneratut nalilerusuppara.

-Najuuttut annerusumik minnerusumilluunniit filmimi oqaatsikka ilisarisinnaavaat. Assut pissangassutigaata qanoq isiginnaartut filmiliannik naliliissanersut. Isumaqarama kalaallit Danmarkimi aviisini allaaserineqaraangata ajortuinnaat eqqaaneqartarnerat mumisillugu ajunngitsortai tusarneqartariaqalersut, oqarpoq.

Ivalo Frank neriuppoq filmiliamini Kalaallit Nunaat ajortoqaannanngitsoq takutitani neriuuteqalersitsiumaartoq.

- Kalaallit Nunaat ingerlalluariartorpoq, tamannalu tusagassiorfiit aamma eqqumaffigisariaqarpaat, naggasiivoq.

Erinarsortartoq Nive Nielsen tusarnaartitsivoq, kulturillu unnua iluatsinnavianngilaq ukoqanngippat.

Kalaallit Danmarkimi erinarsoqatigiivisa ilaat Aavaat aamma appisimaarput.