ASSIT Københavnimi Kalaallit Illuutaanni saqqummersitsineq ammaanersioraat

Ivínguak' Stork Høeghip Anina Hansenillu saqqummersitsinerat pingasunngormat unnukkut ammaanersiorneqarmat inuit 50-it missaat najuupput. Eqqumiitsuliortut taakku assigiimmik sammisaqarlutik saqqummersitsipput, tassalu nunaminnut asanninneq, assigiinngitsunilli periaaseqarput.

Ivínguak` Stork Høeghip suliai tassaapput assit digitalimik katitikkat. Inuiaqatigiinni pissutsinik isornartorsiuinermik ilaatigut imaqarput. Saqqummersitsineq 'Angerlarsimaffiga - inuiaqatikka' kisimiilluni saqqummersitsinerisa siullersaraat. Nuummi ulluinnarni inuuneranut inuiaqatigiinnilu kalaallini pissutsinut tunngassuteqarpoq. Pingasunngormat unnukkut saqqummersitsinerup ammaanersiorneqarnera naammagisimaarlugu oqaluttuarpoq. 

- Isumaqarpunga saqqummersitsinerup ammaanersiorneqarnera ingerlalluartoq. Ikinngutikka inuillu naapissimanngisaannakkakka oqaloqatigaakka. Assinik saqqummersitannik qanoq paasinninnersut tusarlugu soqutiginarpoq, aamma sulianni saqqummersitsinerup qulequtaata ilisarineqarsinnaanera nuannaarutigaara, Ivínguak` Stork Høegh taama oqarpoq.

Anina Hansen taalliornermik qalipaanermillu aallutaqartuuvoq, taassumalu nunaminut peroriartorfigisaminut misigissutsini suliamini aallaavigai. Saqqummersitami 'Det Gyldne Savn'-ip ilassilluarneqarnera aamma taassuma nuannaarutigaa.

- Inuit inussiarnersorpassuit takkupput killitsissimallutillu taakku oqaluttuarput - aamma taalliakka pillugit. Ilaasa isaat immatseqqasut aamma takuakka. Tamanna tupaallaatigaara, ilimaginngikkaluarakku. Inuit qisuariaataat takullugit assut pissanganarpoq. Saqqummersitsinera aqqutigalugu Kalaallit Nunaannut qanillisutut misigivunga, tamannalu nuannaarnermik killitsissutigaara, Anina Hansen, Københavnimi ukiorpassuarni najugaqarsimasoq taama oqarpoq.

Saqqummersitsinerup ammaanersiorneqarnerani assilisat qulaani takukkit.