København-imi meeqqat pinnguaataat nutaaq "politiit unataapput!"

Siornatigut meeqqat pinnguaraangata pinnguaatigineqartaraluarput “Koorput indianerillu” imaluunniit “Inupiluit sakkutuullu”.

Kisianni pinnguaatit tamakkua ilisarnartut nutaamik ullutsinnullu naleqqunnerusumik ateqalersimapput.

Danmarkimi Nørrebromi eqqissiviilliortoqareersorlu meeqqat pinnguaataat taaguuteqalersimavoq “Politiit Ungdomshusimut saassussinerat”.

Tamanna aviisip Politikenip Københavnimi sunngiffimmi ornittakkanut meeqqerivinnullu sianeqattaarnerani paasineqarpoq.

Taakkunannga oqaluttuarineqarpoq meeqqat arfineq-pingasunik ukiullit akerliussutsimik takutitsisuusaartut, aqqusinernik assersuisuusaartut suaartaatigalugulu “Politiit unataapput!”

Tamanna, pinnguarneq pillugu ilisimatusarsimasup Carsten Jessenip tupigusuutiginngilaa.

- Pinnguarnermi pissanganartorsiornissaq pineqartarpoq. Koorput indianerillu ullutsinni meeqqanut soqutiginaataarunnikuupput, kisianni meeqqat tamarmik Ungdomshuset tusaamavaat. Tassani ‘pikkunartunik’ pisoqarpoq, taamaattumillu pinnguarnermi aallaavigissallugu pitsaasuulluni, Carsten Jessen oqarpoq.

Taassuma eqqoriarpaa meeqqat politiiunatik Ungdomshusermiuusaarnissartik pileriginerussagaat.