København ilisarnaatitaalerpoq

København qularnanngitsumik nutaamik ilisarnaatitaartussanngorpoq – illorsuarmik napasuliamik igalaaminermik sisammillu sanaamik. Taanna Rådhusip napasuliarsuata sanianiissaaq pukkinnerulaaginnassallunilu.

Tivoli taama pilersaaruteqarpoq tamannalu borgmesteriunermit Ritt Bjerregaardimit tapersersorneqarluinnarpoq.

Napasuliassaq titartarneqarpoq illussanik titartaasartumit nunarsuaq tamakkerlugu ilisimaneqartumit Norman Fosterimit. Napasuliaq illunit assigiinngitsunit qaliamikkut naatsiivittalinnit katitigaassaaq, hotelitaqarluni 150-inik kusantarinnik initalimmik 50-inillu nammineq pigisanik inissiartaqassalluni.

- Isumaqarpunga Foster kusanarluinnartumik illorsuarmik portusuuliamik mutiusumik titartaasimasoq. Fosterip Tivolimi illuutivut naatsiiviutivullu aallaavigisimavai illorsuarmullu portusuuliamut ilaatillugit, Tivolip pisortaa Lars Liebst oqarpoq.

Maanna pilersaarutip oqartussaasunit akuerineqarnissaa tullinnguuppoq. Tivolillu borgmesteriunermit Ritt Bjerregaardimit tapersersorneqarnissani naatsorsuutigisinnaassavaa.

- Isumaqarpunga illorsuassatut titartagaq kusanarluinnartuusoq inunnillu amerlasuunit nuannaarutigineqarumaartoq. Maannali illoqarfiup pilersaarusiorneranut atatillugu inuinnaallu oqartussaaqataanerat naapertorlugu aalajangiiffigineqarumaarpoq, Ritt Bjerregaard oqarpoq.