København eqqiluitsunngortinniarpaat
Københavnip 2025-mi CO2-mik aniatitsiviujunnaarnissaa anguniarlugu Københavnip kommuniani qinikkat silaannaq pillugu pilersaarummik akuerisaqarput. Pilersaarut suliniutissanik tigussaasunik 50-inik imaqarpoq.
Allattoq Lotte Holm
aggustip 28-at 2009 13:34
- Silaannaap allanngoriartorneranut akiuiniarneq pillugu København illoqarfittut maanna pilersaaruteqalerpoq. København illoqarfittut københavnimiullu inuttut qanoq ileqquminnik allanngortitsisinnaanersut pilersaarummi takuneqarsinnaavoq, atortulersuuteqarneq avatangiisillu pillugit borgmesteri Klaus Bondam oqarpoq.
Suliniutissat ilaat makkuupput: Innaallagissiuutit anorisaatit, biilit innaallagissamik brintimillu ingerlatillit, kommunip illuutaanik oqorsaaneq, ilinniartitsisut perorsaasullu silaannaq pillugu atuartitsisalissapput, meeqqallu 10.000-it sinneqartut kommunip orpippassualiassaani orpimmik naatitassamik ikkussisinnaassapput. Tamakkua saniasigut siallernerani erngup kuuffissaanik anginngitsunik illoqannginnersaqarfiliortoqassaaq.
