Kyotomi isumaqatigiissut pisussaaffiliivoq

Allaammi 1990-imut naleqqiullugu aniatitsineq annerulersimasoq Avatangiisinut Pinngortitamullu Pisortaqarfiup aamma Inuutissarsiornermut Pisortaqarfiup kisitsisaataasa ersersippaat.

- Qularutissaanngilaq Kalaallit Nunaat angisuumik suliassaqartoq, 2012-ip naanginnerani annikillisitsinissamik pisussaaffik eqquutsinneqassappat, avatangiisinut naalakkersuisoq Arqalo Abelsen Marie Fleischerimut Demokraatineersumut akissuteqaammini allappoq. Marie Fleischerip Kyotomi isumaqatigiissummut atatillugu Nunatta inissisimanera apeqquteqaatigimmagu.

Nunatta Danmarkillu Kyotomi isumaqatigiissummut ilanngunneratigut, Nunatta gassinik silaannarmik kissakkiartortitsisunik aniatitsinini 1990-imut naleqqiullugu, 2008-mit 2012-ip tungaanut 8 procentimik appartinnissaanut pisussaaffeqarpoq.

gassimik silaannarmik kissakkiartortitsisumik aniatitsineq 1990-imiit qanoq annertusiartorsimanersoq Nunatsinni naalakkersuisut malinnaaffigaat. Taamaattorli kisitsisit 2005-imut aamma 2006-imut tunngasut suli pigineqanngitsut, Arqalo Abelsen allappoq.

Nunatsinni naalakkersuisut aqutsisoqatigiinnik pilersitsiniarput, taakkualu aniatitsinerup millisinneqarnissaa qulakkeerniartussaassavaat.