Kyotomi isumaqatigiissummut Savalimmiut ilannguppoq
Nunat tamalaat silamik mingutsaaliuiniarlutik Kyotomi isumaqatigiissutaannut Savalimmiut ilanngunniarluni piareerpoq. Ilanngunnermikkut Savalimmiuni gassinik silaannaap kissakkiartorneranut killilersueqataalissapput.
Danmarki 2002-mi naalagaaffeqatigiit sinnerlugit Kyotomi isumaqatigiissummut atsioqataavoq, Naalagaaffiup taamani Savalimmiut peqataassanngitsut erseqqissaatigaa. Savalimmiut ilanngutinnginnerminni paasiniaqqaarpaat Savalimmiuni qanoq mingutsitsisoqartiginersoq. Savalimmiuni lagmandip Joannes Eidesgaardip Savalimmiut peqataalernissaanik kissaataa, Lagtingimi taamaasillutik amerlanerusut maanna illersulerpaat.
CO2-mik qanoq angitigisumik Savalimmiuni mingutsitsisoqartiginersoq erseqqivissumik paasisaqartoqanngikkaluarpoq.
Kisitsisilli 1995-imi saqqummersut takussutissaqartippaat Savalimmiormiut nunarsuarmi mingutsitsinerpaanut ilaasut. Kingullermik 2002 -mi misissuisoqarmat erserpoq Savalimmiuni mingutsitsineq suli annerulersimasoq.
